O comité de Ferroatlántica Cee-Dumbría acusa a Feijóo de “dar ás” á segregación da empresa
Os representantes dos traballandores xa están a estudar un novo calendario de mobilizacións para conseguir a "non segregación de actividades" e a venda das centrais.
- Constituída a comisión de seguimento do plan de investimentos do grupo Ferroatlántica
- Ferroatlántica crea unha nova sociedade para a súa división industrial á espera de que a Xunta responda á súa solicitude
- Feijóo asegura que non se deixará “presionar” pola venda de Ferroatlántica
Por E.P. | SANTIAGO DE COMPOSTELA | 24/05/2017 | Actualizada ás 19:48
O comité de empresa de Ferroatlántica Cee-Dumbría-centrais hidroeléctricas xa está a estudar un novo calendario de mobilizacións para conseguir a "non segregación de actividades" e a venda das centrais. Así o anunciou este mércores tras a súa asistencia ao pleno do Parlamento, onde, na sesión de control ao presidente da Xunta, se abordou a súa problemática.
"Unha vez máis, as respostas do presidente da Xunta son esquivas e non constitúen unha aposta clara pola defensa dos nosos postos de traballo e pola non segregación das actividades de ferroaleación e produción enerxética", critican estes traballadores.
Lamentan, de feito, que isto non é "nada novo", pois, na súa opinión, "o Goberno autonómico vén mantendo unha postura ambigua desde que se coñeceron publicamente as pretensións de Ferroatlántica de vender as centrais hidroeléctricas".
O comité defende que non pide "nada extraordinario". "Pedimos ao presidente da Xunta o mesmo que cando no ano 1992 o grupo Villar Mir se fixo co complexo industrial da Costa da Morte: legalidade e xustiza", subliñan.
A Xunta, inciden, "ten que actuar conforme a legalidade, porque esa é a única vía para garantir que se respecte o interese público e que se faga xustiza con esta comarca".
Reprochan ao titular do Executivo galego, Alberto Núñez Feijóo, que na súa intervención "volve escudarse no papel dos servizos xurídicos, chegando mesmo a afirmar que de ser compatible a segregación que pide Ferroatlántica coa normativa vixente, esixirá tantas ou máis garantías de emprego que as que existen".
Coas súas afirmacións, destaca o comité de Cee-Dumbría, "está a dar ás ao manido proxecto industrial da empresa, que non é outra cousa que un plan de reconversión e desmantelamento". Ademais, estes traballadores recriminan a Feijóo que "pon en cuestión as reivindicacións do conxunto" do persoal da Costa da Morte e dos veciños da comarca.
"Non hai mellor plan industrial que o que temos actualmente. Non hai mellor garantía de continuidade dos empregos e da actividade nas fábricas que manter as concesións nas condicións actuais. A mellor forma de facer xustiza coa Costa da Morte pasa porque a empresa reinvista nas fábricas os millonarios beneficios xerados pola explotación dos aproveitamentos hidráulicos", proclama este comité.
