Os partidarios de Pedro Sánchez perden terreo en Vigo e Ourense
O PSdeG continúa co proceso de votacións. Tras as primarias nas que arrasou Pedro Sánchez, os socialistas galegos deben elixir os delegados que os representarán no Congreso estatal. Eles escollerán a nova Executiva que goberna Ferraz.
Por Galicia Confidencial | Santiago de Compostela | 26/05/2017 | Actualizada ás 14:36
Polo visto xa en Vigo e Ourense, a clara vitoria dos ‘sanchistas’ nas primarias non se repetirá na elección de delegados, ou polo menos non por tanta marxe.
Así, por exemplo, en Vigo a lista de Carlos Font gañoulle á lista de Gonzalo Caballero por medio centenar de votos, con case o 60%. Un claro triunfo para os do bando do alcalde Abel Caballero, amargamente derrotado nas primarias.
Na votación de onte pola noite en Vigo, houbo 346 participantes. Uns 197 apostaron pola lista de Carlos Font, 146 pola do sobriño e crítico co alcalde Gonzalo Caballero e 3 votos en blanco.
Así as cousas, a lista de Gonzalo Caballero consigue 23 delegados e a de Carlos Fon, 30. En declaracións á Ser, Font acusou ao seu rival de “arrogarse a presentación de Pedro Sánchez” sen motivo.
Os ‘sanchistas’ si que gañaron en Ourense, pero cunha marxe moito máis estreita que nas primarias. A lista que encabezaba Rocío Frutos triunfou, pero con só 7 votos de avantaxa sobre a que organizaron os próximos a Susana Díaz. A candidatura de Frutos, a deputada que é se cadra o rostro máis visíbel do bando de Pedro Sánchez en Galicia, estivo lastrada porque houbo unha terceira candidatura que abrazou en gran medida o discurso pro-base do novo líder estatal.
Estes son os primeiros pasos dun longo proceso que debe desenvorcar na convocatoria dun Congreso en Galicia para elixir a nova dirección do PSdeG. El Progreso apunta que os críticos con Sánchez poderían renunciar a dar batalla, pero visto estes resultados en Vigo e Ourense está por ver se tal retirada é definitiva.
