A Xunta aposta por captar novos clientes náuticos en diferentes puntos de Europa

A conselleira do Mar, Rosa Quintana, apostou por captar novos clientes náuticos en diferentes puntos de Europa para o conxunto das instalacións náutico recreativas galegas, tanto dependentes da Xunta como do Estado.

Así o manifestou a titular do departamento autonómico na reunión de coordinación das Autoridades Portuarias de Galicia que se celebra periodicamente na sede dos diferentes portos estatais e que este venres tivo lugar na Autoridade Portuaria da Coruña, despois dunha visita ao porto exterior de Punta Langosteira.

"Queremos seguir potenciando esta actividade que está a xerar capacidade económica nos portos e nas cidades onde chegan", sentenciou con motivo desta reunión.

Para iso, a Consellería, a través de Portos de Galicia e en coordinación con Turismo de Galicia, encabezará a participación dos xestores náuticos galegos en diferentes salóns e feiras náuticas nos que poderán presentar a oferta de servizos e instalacións náuticas da comunidade autónoma galega.