SANTIAGO DE COMPOSTELA | 29/05/2017 | Actualizada ás 15:01 por EUROPA PRESS
O presidente da Xunta, Alberto Núñez Feijóo, asegurou este luns que o Goberno galego esperará a coñecer se a petición de segregación de Ferroatlántica é "conforme a dereito" para esixir "garantías" en relación ao mantemento de postos de traballo.
En resposta a preguntas dos medios de comunicación, Feijóo asegurou que o respaldo dos sindicatos UXT e CC.OO. ao plan industrial da compañía obedece a "buscar o mellor interese para os traballadores".
Con todo, lembrou que "ningunha administración pode estar á marxe do Estado de Dereito", polo que "o primeiro" que debe facer a Xunta en relación a esta proposta é "comprobar a legalidade da solicitude".
"No caso de que fose conforme a dereito, pediriamos garantías de mantemento de postos de traballo igual ou superior aos que concreta a empresa", dixo Núñez Feijóo que apostou por guiarse polo "interese público" e indicou que un pronunciamento agora mesmo sería "precipitado". "Imos esperar a que os letrados fagan ese informe", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.