Por Xurxo Salgado | Compostela | 01/06/2017 | Actualizada ás 14:43
A carga policial do pasado martes en Santiago está dando moito que falar. Ás crítica do PPdeG ao Concello de Santiago e Compostela Aberta por apoiar aos manifestantes, súmase a do presidente da Xunta, Alberto Núñez Feijóo, que foi moito máis crítico que os dirixentes do seu partido en Santiago e acusou aos participantes nesa marcha –que rematou con cargas policiais e un detido-- de “agredir” aos policías. Tamén aproveitou para cargar duramente contra o rexedor compostelán, Martiño Noriega, por apoiar a estes grupos.
“Eu estou cos funcionarios, que teñen familia e fillos, e que foron agredidos por uns poucos que intentan impoñer os seus métodos á maioría”, dixo o presidente galego na rolda de prensa posterior ao Consello da Xunta. “Eu estou a favor das forzas de seguridade do Estado e do cumprimento das sentenzas xudiciais”, engadiu.
Ademais, acusou ao colectivo Escárnio e Maldicer, que ocupaba o edificio desaloxado na mañá do martes, de “non ser estritamente cultural”, de “non respectar as normas de convivencia” e de “agredir a funcionarios públicos”.
Críticas a Martiño Noriega
Feijóo tamén aproveitou a ocasión para criticar a Martiño Noriega e o seu grupo de goberno. “Ás veces as poses de ser partido alternativo pois se lle van das mans”, ironizou ou insistir en que o que fixeron os policías foi cumprir con sentenzas xudiciais “que lle dán a razón aos propietarios do inmoble”.
Sobre as críticas do rexedor de que non foi informado do gran despregue policial, o presidente galego tirou de ironía: “Tamén me podo queixar eu porque tampouco fun informado”. Neste sentido, suliñou que “é imposible” que todas as administracións sexan informadas de situacións nas que se despregan os corpos policiais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.