Por X.M. Fernández | Monforte | 13/06/2017 | Actualizada ás 13:05
O Alcalde, José Tomé, e a concelleira de Cultura, Marina Doutón, presentaron o deseño que foi seleccionado polo xurado como o mellor de todos. Durante a roda de prensa, o rexedor e a concelleira estiveron acompañados do gañador, Eros Marinho Núñez, que recibirá 1.000 euros de premio.
“Sempre pensei que sería fantástico chegar por vez primeira a Monforte en plenas Festas Patronais, a través da rúa do Morín, e ver unha atracción de noria e as cores da propia festa e dos fogos artificiais sobre o ceo e, detrás, o conxunto monumental de San Vicente. É unha imaxe na que pensei en máis dunha ocasión e que sería espectacular”. Con estas palabras, Eros Marinho falou de como xurdiu a idea do deseño que presentou ó concurso deste ano, idea que mestura o real co fantástico.
En canto ao proceso creativo, o gañador explicou que o primeiro que fixo foi fotografiar a rúa do Morín e despois vectorizouna mediante o Adobe Ilustrator, un programa de debuxo vectorial. Para conseguir que a noria fose un elemento de grande impacto visual, Eros empregou unha gama cromática de azuis escuros.
Pola súa parte, o Alcalde, José Tomé, destacou que o concurso para seleccionar o cartel das Festas foi unha actuación que se recuperou o pasado ano 2016; permite a participación a calquera persoa que teña interese en contribuír a divulgar a festa e fai posible que haxa maior aportación de ideas para ter un cartel atractivo e de calidade.
Concurso de carteis
Un total de 19 traballos presentáronse no Concello para participar no XXII Concurso de deseño de carteis das Festas Patronais. A maioría deles foron elaborados por veciños e veciñas de Monforte, en concreto hai 8 traballos da nosa cidade pero tamén chegaron propostas doutras localidades veciñas, como por exemplo do Saviñao.
Ademais participaron artistas doutros concellos galegos. É o caso de Santiago de Compostela, de Lugo, de Teo, de Os Anxeles (Brión), de Tui, Vilaboa e Salcedo (Pontevedra).
Fóra de Galicia o concurso de carteis das Festas tamén espertou interese. Proba diso é que se presentaron dous traballos por parte da mesma persoa de Burriana, en Castellón de la Plana, e outro de Madrid. O xurado estivo estivo constituído polo Xerente de Gadis, un membro do Colectivo Esparrela, un representante da produtora Amanita Films, Némesis Creaciones e o pintor Antonio Vidal Garea.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.