Por E.P. | SANTIAGO DE COMPOSTELA | 21/06/2017 | Actualizada ás 22:02
Ferrol en Común, formación sobre a que recae o goberno municipal de Ferrol, instou ao alcalde da cidade, Jorge Suárez, a retirarlle as competencias de Obras, Vivenda, Rehabilitación e Medio Ambiente a edil crítica Esther Leira, á que tamén pedirán que renuncie á súa acta de concelleira e posibilite a chegada dun novo integrante á corporación ferrolá.
Esta decisión foi acordada con 35 votos a favor, tres abstencións e un voto en contra na asemblea celebrada por Ferrol en Común na tarde deste mércores no local de En Marea, situado na rúa Magdalena de Ferrol.
Precisamente, a edil acudiu ao comezo da asemblea pero, aos poucos minutos e tras pedir que se dese lectura aos estatutos do partido, decidiu abandonar a sala ante a negativa a lelos. E é que, segundo alegou, a asemblea non é valida dado que os estatutos non son conformes á actual lexislación.
Xa á saída do recinto e en declaracións aos medios, a concelleira volveu a trasladar aos medios que non ten intención de entregar a súa acta.
CAUSAS
A esta situación chegouse despois de que Leira decidise ausentarse o pasado venres, 16 de xuño, da votación dunha modificación de crédito nun pleno extraordinario, ao considerar que na mesma non se recollía unha partida de 300.000 euros que o rexedor se comprometeu a incluír con ela para substituír unha cuberta dun edificio do barrio de Recimil, de propiedade municipal.
Tras esta decisión, Leira acusou a Jorge Suárez de "liderar un goberno determinado, un staff, que toma unha serie de decisións" no que cre que ela é vista como "unha persoa molesta". Ademais, lamentou que tivese que "falar fóra", porque no seo do goberno non podía.
O pasado luns, Leira, incidía en que non aceptará "o peche en falso desta situación" e considerou que trata de "unha cuestión política de fondo" que "leva arrastrando desde hai máis de dous anos". "Mesmo de antes da chegada ao goberno", apuntou
Pola súa banda, o alcalde de Ferrol, Jorge Suárez sempre mantivo que sería a asemblea de Ferrol en Común a que tomaría unha decisión "colectiva" sobre as medidas a tomar.
Continúan os catro edís que abandonaron o BNG de Monforte
Por outra banda, os catro edís de Monforte de Lemos (Lugo) que deixaron o Grupo Municipal do Bloque Nacionalista Galego a pasada semana decidiron continuar coas súas actas, segundo confirmou a Europa Press a que foi candidata á Alcaldía pola formación nacionalista Pilar López.
En concreto, ademais da propia Pilar López, os concelleiros que continuarán coas actas coas que se fixeron nos pasados comicios municipais, aos que concorreron baixo as siglas do BNG, son Alicia Cadarso, María Xosé Veiga e o independente Víctor López.
A xa exmilitante do Bloque explicou que tanto ela como o seu tres compañeiros tomaron esta decisión ao considerar "a importancia que teñen as persoas nas eleccións" a nivel local e despois de "escoitar as opinións dos veciños". "Foron moitas as persoas que estes días nos chamaron para dicirnos que tiñamos que estar aí", manifestou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.