Feuga rexistrou un volume de actividade de 16,5 millóns de euros en 2016

A Fundación Empresa Universidade Galega (Feuga) consolidou o seu volume de actividade nos últimos anos, alcanzando os 16,5 millóns de euros en 2016.

Segundo explica nun comunicado de prensa, os programas de bolsas e a xestión de proxectos de I+D son as principais liñas de acción da entidade.

Así o mostran os datos da memoria anual do pasado exercicio presentada ante a Xunta e Padroado da Fundación, reunidas este xoves en Santiago baixo a presidencia de Salustiano Mato.

O departamento de Proxectos Europeos de Feuga continúa co crecemento iniciado en anos precedentes, sinala a entidade. O seu labor, asegura, deu como resultado en 2016 a xestión de oito proxectos en sectores "estratéxicos" da economía galega, como o sector vitivinícola, o lácteo ou o ambiental.

Neste sentido, a fundación continuou coa xestión dos proxectos europeos Susmilk, Cyto Water, Cfis-Ecopharma, Pathogen, Winetwork, Vitis Europa e Smarter Together.

Ademais, conseguiu a aprobación dun novo: Wetwine, baseado na revalorización dos residuos xerados na industria vitivinícola. Por outra banda, Feuga participa como experto no Focus Group 23 da EIP-AGRI, que pretende achegar solucións para combater as pragas e enfermidades que afectan á viticultura.

Así mesmo, Feuga é membro de varias plataformas europeas para favorecer a creación de consorcios e a presentación de proxectos.

Á marxe dos proxectos europeos, Feuga xestionou 156 contratos de investigación e desenvolvemento por importe de máis de 2,8 millóns de euros co tres universidades galegas co fin de favorecer a transferencia tecnolóxica entre empresa e universidade.

AUMENTO DE BOLSAS

Pola súa banda, indica que a área de bolsas incrementou nun 7% o número de beneficiarios dos programas de bolsas da fundación logrando a participación de máis de 2.900 mozos.

Durante 2016, a Fundación apunta que beneficiou a 1.476 titulados universitarios, un 13,5% máis con respecto ao ano anterior, que foron acollidos en 669 empresas.

Pola súa banda, o Programa de Bolsas de FP saldouse con 790 beneficiarios en 444 empresas. A modalidade de bolsas para estudantes de FP Dual propiciou a estancia práctica de 183 estudantes en 51 empresas.

No Programa de Bolsas Estudantes, dirixido a alumnos dos últimos cursos das universidades galegas, participaron 462 estudantes que realizaron prácticas en 256 compañías.

O pasado ano, Feuga desenvolveu 60 accións formativas (cursos e seminarios) nas que participaron máis de 800 persoas. Estas actividades están orientadas a satisfacer as necesidades formativas e de cualificación do tecido empresarial e da comunidade investigadora galega.