A vella Pescanova emprenderá accións contra Nueva Pescanova polo cesamento dos seus conselleiros
Considera que o cesamento dos seus dous conselleiros "vulnera unha vez máis" os acordos asinados entre ambas as sociedades, polo que iniciará accións xudiciais.
Por E.P. | MADRID | 28/06/2017 | Actualizada ás 10:23
O consello de administración da 'vella' Pescanova anunciou este mércores que emprenderá accións xudiciais contra Nueva Pescanova por cesar aos dous conselleiros que historicamente mantiña no consello de administración desta sociedade.
A 'vella' Pescanova considera que este cesamento "vulnera unha vez máis" os acordos asinados entre ambas as sociedades, "cuxa validez e eficacia foi confirmada xudicialmente", sinala a compañía nunha comunicación remitida á Comisión Nacional do Mercado de Valores (CNMV).
"Este cesamento obrigará a Pescanova a acudir novamente aos tribunais para defender os seus lexítimos intereses", engade a empresa, que denuncia ademais que coa saída dos seus dous representantes no consello de administración de Nueva Pescanova elimínase unha das principais canles de comunicación entre ambas as sociedades, "o que só pode redundar en prexuízo de ambas", precisa.
A xunta xeral dos socios de Nueva Pescanova aprobou onte reducir a dez o número de conselleiros tras cesar aos dous representantes da 'vella' Pescanova, cuxa participación se reduciu do 20% ao 1,65% tras a ampliación de capital aprobada o pasado mes de abril.
