Félix Mondelo toma posesión este venres como novo presidente do Consello da Avogacía Galega

O decano do Colexio de Avogados de Lugo, Félix Mondelo, tomará posesión este venres como novo presidente do Consello da Avogacía Galega en substitución de Evaristo Nogueira.

Este acto terá lugar no Colexio Provincial de Avogados da Coruña (12,30 horas), e entre outros acudirán o presidente do Tribunal Superior de Xustiza de Galicia, o fiscal superior de Galicia, e diversos alcaldes e representantes de institucións.

Félix Mondelo, licenciado en Dereito pola Universidade de Santiago de Compostela, exerce a profesión desde 1981 e desempeñou durante estes anos a asesoría xurídica de diversas empresas e entidades. A finais de 2010 foi elixido decano dos avogados de Lugo.

O Consello da Avogacía Galega, creado en 1993, é o órgano superior da organización profesional en Galicia, que agrupa aos colexios de avogados das sete cidades.