Medidas concretas anti-eucalipto para evitar que Galicia sufra o que sufriu Portugal
A Asemblea Contra a Eucaliptización reacciona á traxedia do incendio de Pedregao Grande. O grupo de colectivos ecoloxistas identifica o monoculitvo de eucalipto para fornecer a ENCE como unha das principais causas dos incendios e lembra que antes dos anos 70 non había tantas vagas de lumes.
Por Galicia Confidencial | Santiago de Compostela | 29/06/2017 | Actualizada ás 12:35
Como unha das medidas para evitar mortes como as de Portugal ou de Cercedo (2006) piden lexislar franxas para “frear a expansión incontrolada de plantíos de eucaliptos”:
Estas son as distancias de seguridade propostas polos ecoloxistas:
- Rede Natura: erradicación das masas de eucaliptos
- Liña de costa: faixa de exclusión de 1km
- Camiños de Santiago e vías verdes: faixas de exclusión dun mínimo de 1km a ambos lados
- Vías verdes e outros camiños históricos: faixas de exclusión de 0.5km a ambos lados
- Paisaxes protexidas: erradicación das masas de eucaliptos
- Patrimonio histórico e arqueolóxico: faixas de exclusión de dimensións variábeis en función do espazo e elemento patrimonial (mínimo 25m en elementos menores singulares como petróglifos e mámoas e, no caso de elementos maiores como castros ou conxuntos etnográficos e arqueolóxicos, ordenación específica con distancia de exclusión a estudar caso a caso)
A Xunta está a especular coa posibilidade de limitar a plantación en Ourense e no Sur de Lugo. Dúas áreas sen moitos eucaliptos até hoxe, pero ameazadas por un novo subtipo máis resistente ás xeadas.
Esta moratoria non lle abonda aos ambientalistas, que propoñen a “reversión dos plantíos de eucalipto efectuados nos últimos 5 anos en terras agrarias e sustitución por frondosas autóctonas con fins produtivos”. Cómpre lembrar que a Lei xa prohibe plantar estas árbores en leiras agrícolas, límite que os propietarios violan abertamente sen que a Xunta tome, na gran maioría dos casos, medidas.
Nas áreas de monte xa plantadas, a Asemblea reclama que unha parte se adique a árbores do ;en concreto, para bosques de máis dunha hectárea: 30% en eucaliptais, 20% en coníferas e 10% en frondosas e caducifolias, rompendo así a continuidade das zonas máis propensas ao lume.
A nivel local, os ecoloxistas propoñen que en cada parroquia galega haxa espazos declarados libres de especies invasoras, incluída o eucalipto.
“Os lumes de Portugal confirman que a deseucaliptización de Galicia é unha tarefa urxente”, conclúe este colectivo.
