Feijóo deberá render contas na Cámara polo veto do Goberno central ao traspaso da AP-9
O presidente da Xunta deberá comparecer no próximo pleno para responder pola negativa do Executivo de Rajoy á transferencia e explicar que medidas porá en marcha para sortear esta circunstancia.
- Feijóo sofre unha das súas derrotas políticas máis evidentes
- O Goberno central teima en vetar a transferencia da AP-9
Por Europa Press / Redacción | SANTIAGO DE COMPOSTELA | 04/07/2017 | Actualizada ás 13:58
O presidente da Xunta, Alberto Núñez Feijóo, deberá render contas no próximo pleno sobre o veto imposto polo Goberno ao debate en relación á transferencia da AP-9 a Galicia, así como explicar que medidas porá en marcha para sortear esta circunstancia.
Os tres grupos da oposición (En Marea, PSdeG e BNG) explicaron ao termo da reunión de portavoces que se fixou a orde do día da sesión plenaria da semana próxima, na que Feijóo deberá explicar a negativa do Goberno de Mariano Rajoy debater a proposta consensuada por todas as forzas representadas no Parlamento de Galicia a prol do traspaso de competencias sobre a autoestrada do Atlántico.
O certo é que a transferencia das competencias sobre a AP-9 está debilitando a imaxe de Feijóo como home poderoso no PP a nivel estatal e posible candidato a suceder a Rajoy. A confirmación de que o Goberno veta por segunda vez o debate sobre este traspaso evidenciou a perda de peso do presidente galego en Madrid. De feito, a Xunta mesmo coñeceu pola prensa a noticia. Agora, a oposición, indignada, furga na ferida aberta e pídelles que responda por esta contradición entre o PP galego e o estatal.
O Parlamento de Galicia aínda non recibiu a comunicación oficial sobre este novo veto do Goberno a tramitar no Congreso a proposición de lei de traspaso da AP-9. O presidente da Cámara galega, Miguel Santalices, actuará, unha vez que se reciba a notificación segundo o que decidan os órganos da Cámara e aconsellen os servizos xurídicos.
Á marxe deste asunto, os conselleiros de Infraestruturas e Educación, Ethel Vázquez e Román Rodríguez, respectivamente, comparecerán ante o pleno da Cámara para abordar a folga de transporte e as mobilizacións xurdidas a raíz do peche de catro centros escolares.
Así mesmo, na sesión deste martes debateuse o proxecto de lei de modificación orzamentaria (impulsado pola Xunta para incluír as achegas extraordinarias de Estado) e unha proposta normativa da oposición para garantir a igualdade de trato aos transexuais.
