Vicepresidencia dá discrecionalmente 315.000 euros a algúns xornais
A Vicepresidencia da Xunta acaba de publicar no DOG, como lle obriga a Lei, os convenios de colaboración que asinou neste cuadrimestre. Os medios de comunicación volven a ser os máis beneficiados dos investimentos discrecionais do departamento de Alfonso Rueda. Deles, La Voz de Galicia volve a ser a máis favorecida.
Por M.V. | Santiago de Compostela | 05/07/2017 | Actualizada ás 08:00
En concreto, o diario de Santiago Rey recibirá 149.767,95 € coa finalidade oficial de “difusión das actividades desta consellería de interese para a cidadanía”. É dicir, case 150.000 públicos da Vicepresidencia para que La Voz informe do traballo da propia Vicepresidencia. Só hai un convenio con máis diñeiro público co da Voz, os 170.000 para financiar o funiconamento do Instituto de Medicina Legal de Galicia (IMELGA) e o Instituto de Ciencias Forenses «Luis Concheiro»
O departamento de Rueda firmou outros oito convenios con outros oito diarios impresos para a mesma finalidade, a “difusión das actividades desta consellería de interese para a cidadanía”.
Desta volta, as subvencións directas, segudno o DOG, repartense así:
- Corporación Voz de Galicia 149.767,95 €
- Faro de Vigo, S.A 69.856,43 €
- Lérez Ediciones, S.L (Diario de Pontevedra, Grupo El Progreso) 24.873,12 €
- El Progreso de Lugo, S.L 24.873,12 €
- La Región S.A. 23.020,87 €
- Editorial Compostela, S.A (El Correo Gallego) 16.934,89 €
- Editorial La Capital, S.L. (Ideal Gallego, diarios de Arousa e Ferrol) 9.790,48 €
- La Opinión de A Coruña 8.467,45 €
- Rías Baixas Comunicación (Atlántico Diario Grupo La Región) 3.704,51 €
Malia que en Galicia tanto a radio como a prensa dixital hai anos que teñen máis audiencia que unha prensa en papel el declive, Vicepresidencia e o resto de departamentos da Xunta acostuman a repartir os convenios só entre os xornais impresos, nun intento de influír na liña editorial dos principais grupos de comunicación.
A diferencia das subvencións normais, reguladas pola Lei de Subvencións, que están suxeitas a publicidade e concorrencia; o reparto dos convenios depende do criterio do mandatario de turno. Aproveitando esta vía legal, a Xunta ven subvencionando a dedo e aos xornais dende a era Fraga, bipartito incluído. Non hai outro sector no país que recibira de xeito tan recurrente tantas subvencións discrecionais.
A Lei especifica que non se poden firmar convenios con ánimo de lucro. É dicir, que os xornais deberían gastar todo o recibido en producir a información encargada por Vicepresidencia. O que é difícil de entender é que iso lle custe case 150.000 euros a La Voz e a penas 3.000 a Atlántico Diario. A escala de reparto coincide, máis ben. coa audiencia de cada medio. A máis audiencia, máis diñeiro por informar da Vicepresidencia.
Baixo que xustificación se reparten a dedo subvencións aos medios de comunciación? Isto é un dos puntos que debe figurar na memoria xustificativa de cada convenio que, segundo a Lei que regula o Rexistro de Convenios, debe ser pública en Internet.
Sen embargo, o Rexistro de Convenios non publicou información algunha sobre estas subvencións, a pesar de case todos os convenios foron firmados hai máis de seis meses, en decembro do ano pasado.
GC denunciou hai varias semanas que o Rexistro de Convenios deixara de publicar información. O último convenio publicado era de 2016. Dende aquela, o citado Rexistro publicou algúns acordos máis, pero segue sen actualizar a información dos asinados por Vicepresidencia, malia que o citado Rexistro depende, precisamente, da consellería de Alfonso Rueda.
