O Sergas nega a traballadoras eventuais horas de lactación e permisos por matrimonio
O Sindicato de Santiarios Galegos públicos denuncia que a Xerencia do Servizo Galego de Saúde impide a unha empregada eventual escoller as súas horas de lactación así como gozar da licenza por casamento.
Por Galicia Confidencial | Santiago de Compostela | 06/07/2017 | Actualizada ás 09:00
Nin horas para a lactación nin permiso para casarse. O Sergas vén de impedir estes dereitos a unha traballadora eventual que pediu dúas semanas de permiso pola súa voda e escoller as súas horas de lactación, como prevé a Lei. Así o denuncia o Sindicato de Sanitarios Galegos Púlicos (SAGAP), que critica que o Sergas "se ampara nun acordo desfasado de 2001 que recolle, ademais, que as traballadoras que vaian casar non deberían aceptar os seus contratos de traballo". Este "ataque", din, "prodúcese ademais sobre o tipo de persoal máis precario co que conta a administración galega, os traballadores eventuais".
O sindicato SAGAP, así como moitos membros da comunidade sanitaria galega, denuncian que a xestión do Sergas "ataca os dereitos das súas traballadoras ao mesmo tempo que asegura publicamente promover a concialición familiar e respectar os dereitos das súas traballadoras".
SAGAP lembra que está non é a primeira vez que se dá un caso deste tipo, e "son incontables as denuncias que sindicatos e traballadoras do servizo galego de saúde interpuxeron contra o Sergas", das cales "a maior parte acaban con sentenza favorable ás traballadoras tanto en tribunais estatais como en Estrasburgo", din dende o sindicato, que cualifica de "ruíns" e "impresentables" aos xestores do Servizo Galego de Saúde. "Os mesmos que se gaban da enorme conciliación familiar que nos permiten cando falan nos medios, toman medidas contra nós e as nosas familias sempre que teñen que tomar unha decisión", critican.
