Os bombeiros de Lugo denuncian que cobran 3.000 euros menos que os demais de Galicia
Pídenlle á Xunta os mesmos fondos que concedeu a Deputación de Lugo para equiparar soldos.
Por Galicia Confidencial | Lugo | 06/07/2017 | Actualizada ás 11:07
Bombeiros da provincia de Lugo manifestáronse este mércores en Lugo para esixir á Xunta que desbloquee a súa equiparación salarial, pois está pendente de que o Goberno galego conceda os 330.000 euros que xa achegou o Executivo Provincial ao Consorcio Provincial de Bombeiros de Lugo para poder efectuarse. Estes profesionais cobran 3.000 euros menos que os do resto de Galicia cando fan o mesmo traballo.
Así, denuncian que cobran 18.000 euros ao ano e os de Ourense uns 21.000 euros; unha diferenza que, din, “non ten sentido, pois polo mesmo traballo hai que ter o mesmo salario”. Tamén o deputado provincial do PSdeG, Santos Ramos, denuncia que “o PP na Xunta e na Deputación tentan confundir á xente, posto que o Goberno galego non ten ningún problema en investir nos salarios dos profesionais de Ourense, pero si nos de Lugo”.
“Que se deixen de confundir e enganar á xente, facendo ver que defenden esta equiparación salarial na Deputación de Lugo, cando é a administración que si cumpriu cos bombeiros, por iniciativa do seu Presidente. Que defendan o mesmo ante a Xunta de Galicia, que é a administración, gobernada polo PP, que está a bloquear esta xusta equiparación salarial, que si fixeron na provincia de Ourense pero non na de Lugo”, denunciou en declaracións aos medios durante a protesta.
