As teses políticas de Villares impóñense ás de Beiras no plenario de En Marea

As teses políticas defendidas polo portavoz de En Marea, Luís Villares, impuxéronse ao documento presentado pola liña crítica coa dirección da formación rupturista e que contaba co apoio do histórico dirixente nacionalista, Xosé Manuel Beiras.

O plenario que En Marea celebra este sábado en Santiago, dominado polos reproches e críticas entre distintos intervenientes, aprobou o documento político presentado pola liña oficial, encabezada polo portavoz da formación rupturista, ao que se lle engadiron unha serie de emendas.

Con todo, a emenda á totalidade do documento oficialista, impulsada polo sector crítico 'Recuperar En Marea', foi rexeitada por unha diferenza de 40 votos. A intención de Villares era integrar as propostas dos críticos nun único documento que fose sometido a votación, algo que foi rexeitado por estes.

OFERTA DE PACTO

Ao plenario saíu o propio portavoz, Luís Villares, a defender a súa visión e a reiterar a súa oferta de pacto, que non foi tida en conta; mentres o texto de 'Recuperar En Marea', concibido como unha emenda á totalidade, foi presentado por Antón Dobao.

Durante a intervención de Villares foron constantes as chamadas á "incorporación total" das emendas dos críticos e, de feito, apelou ao "principio de fraternidade" como forma de construír unha "fronte ampla de esquerdas".

Porén, Antón Dobao obxectou que as liñas dos dous documentos son "incompatibles", xa que o seu grupo se opón á deriva cara "un partido clásico" que tomou, ao seu xuízo, a formación rupturista.

"Non é un debate dunha persoa ou de cargos. É un debate do que somos e queremos ser", incidiu Dobao, para logo criticar que, ao longo dos últimos meses, En Marea transixa" e derive "cara un partido clásico", o que contradí o espírito de "unidade popular" que, segundo esta liña, "non pode morrer nunha coalición electoral".

"NON NOS OBRIGUEDES A ESCOLLER"

Tras isto, Villares volveu ao estrado para censurar que, na exposición da emenda á totalidade, os críticos non argumentaran "en que consistía a imposibilidade de acumular un documento a outro". "Non nos obriguedes a escoller", pediu.

"Esta é unha emenda á totalidade da proposta política", respondeu Dobao, quen remarcou o carácter "contraditorio" dos textos, xa que os críticos propoñen "unha maneira de entender este espazo de forma diferente".

Xosé Manuel Beiras, quen esta mesma semana expresara o seu apoio ás teses políticas do documento 'Recuperar En Marea' a través das redes sociais, pediu intervir ao termo do debate, aínda que non lle foi concedida a palabra ao non solicitalo polas vías establecidas polo regulamento do plenario.