Por Galicia Confidencial | SANTIAGO DE COMPOSTELA | 20/07/2017 | Actualizada ás 14:23
O presidente da Xunta, Alberto Núñez Feijóo, non quere que "ninguén vaia por libre" durante a organización do Xacobeo 2021, o gran evento turístico de comezo da vindeira década para Galicia. Un aviso que ía especialmente dirixido ao Concello de Santiago.
Por iso, anunciou a creación da comisión organizadora para o Xacobeo 2021 co obxectivo de aproveitar os anos que faltan para a cita e lograr que o próximo Ano Santo sexa "o mellor da historia" de Galicia. Unha comisión da que el mesmo será o presidente e na que tamén estará integrado con voz e voto o Concello de Santiago, "que pode ser na figura do seu alcalde". Ese órgano terá un vicepresidente primeiro, que será o conselleiro de Cultura, Román Rodríguez, e unha vicepresidenta segunda, que será a titular de Turismo, Nava Castro.
Así, o anunciou o máximo mandatario autonómico na rolda de prensa posterior ao Consello da Xunta onde explicou que xa se iniciaron os trámites para que "no menor tempo posible" estea a funcionar este órgano que dará "estabilidade e permanencia" para preparar o Xacobeo traballando "de forma coordinada e conxunta".
"É unha oportunidade histórica que é necesario preparar sen dilación", dixo. Por iso, esta comisión aspira a coordinar o traballo das distintas administracións "para que ninguén vaia por libre". Entre os asuntos a abordar estará, por exemplo, a aprobación do plan estratéxico.
Outros membros da comisión
Dentro desa comisión de traballo tamén estara un membro do Arcebispado de Santiago, da Delegación do Goberno e un representante dos concellos galegos por onde pase o Camiño que será designado pola Fegamp. Este órgano estará adscrito á propia Presidencia da Xunta.
"O ano 2021 será un revulsivo para consolidar Galicia como un destino turístico, espiritual e económico e por iso é importante poñer a imaxe da comunidade a nivel nacional e internacional", indicou ao destacar a importancia desta data.
Neste sentido, aventurou que o Xacobeo 21 pode marcar "un novo récord" xa que lembrou que o de 2010 foi austero debido "á fonda crise económica". "Por iso, este pode ser moito mellor", avanzou, "un dos grandes eventos da historia de Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.