Por X.M. Fernández | Monforte de Lemos | 22/07/2017 | Actualizada ás 10:44
Co gallo do 40 aniversario de “Star Wars, una nueva esperanza” a organización deste festival de cine fantástico de Monforte decidiu renderlle unha pequena homenaxe. Primeiro foi xa no propio deseño do cartel deste ano e despois co desfile que terá lugar o sábado 29 a partir das 18.30 h. polas principais rúas da capital da Ribeira Sacra con máis de 20 personaxes da Tropa Imperial.
Haberá varias exposicións permanentes dedicadas ao ilustrador Nando Vázquez, o artista plástico Josef Méndez e o fotógrafo Gana Indrani, pero a guinda a este gran cóctel artístico correrá a cargo do ilustrador Mo caró, un porta-dista con trazo espectacular e toque vintage dos 80. O venres 28 a partires das 19.00 h. hai programada unha charla con el sobre cartelismo e cinema.
As sesións oficiais de curtametraxes serán na Casa da Cultura Lois Pereiro os días 27, 28 e 29 a partir das 20.30 h. e as longametraxes os días 27 e 28 no Parque dos Condes a partir das 22.00-22.30 h. Outra novidade para esta edición, levar o cinema ao aire libre e aproveitar o pequeno anfiteatro que hai no devandito parque, lugar onde tamén terá cabida a música ao remate dos pases cinematográficos.
E para o domingo 30, último día do festival, está programada a “Fantafesti” na que os protagonistas serán os novos valores monfortinos. Na Casa da Cultura a partir das 19.30 h. farase o pase de “Olvidados”, curtametraxe realizada e guionizada por alumnos dos Escolapios, e “Send Them to the Slaughterhouse”, dirixido por Anabel Soto, talento monfortino tamén e xa ás 20.30 h repetición das curtas gañadoras da sección oficial.
Como colofón a este festival, no Multicines Hollywood ás 23.00 h. poderase ver o filme de Billy O’Brien “I am not a serial killer”.
A gala de apertura será o xoves 27 ás 19.30 h. e a de clausura o sábado 29 ás 22.30 h. na Casa da Cultura. Haberá dous puntos de información e entrega de entradas situados na Rúa Cardeal e na Praza España.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.