Por gcdeportes | Lugo | 22/07/2017 | Actualizada ás 19:35
Unha prata e un bronce para os atletas galegos no Europeo júnior de Grosetto. Tariku Novales proclamouse subcampión europeo na proba dos 5.000 metros, mentres que o viveirense Adrián Ben foi bronce nos 1.500 metros do Campionato de Europa U20 que se celebra en Italia.
Na proba de 1.500, Adrián Ben, atleta lucense do FC Barcelona, entrou na última volta na parte de atrás do grupo, pero foi remontando polo exterior (coincidindo coa caída do noruegués e gran favorito Jakob Ingebrigtsen) ata chegar á última curva en cabeza, a carón do británico Jake Heyward. Pero na recta final, Adrián acusou o esforzo e non puido seguir o ritmo do atleta británico, primeiro na liña de meta con 3.56.73, sendo ademáis superado no esprinte polo belga Dries de Smet, que foi segundo con 3.56.98. Adrián Ben fixo 3:57.32, lonxe da súa mellor marca, 3:40.72, que acadou o mes pasado en Huelva. Os tres primeiros entraron en meta con apenas 60 centésimas de diferenza.
Nos 5.000 metros, Tariku Novales, atleta de Noia de orixe etíope, foi en todo momento controlando a proba, e incluso tirando en cabeza nalgúns intres do percorrido. Ao paso pola última volta, o noruegués Jakob Ingebrigtsen, menos de tres horas despois da súa caída nos 1.500, cambiou o ritmo e foise a pola vitoria. Tariku cambiou tamén e foise tras el, pero tivo que conformarse co segundo posto, sempre controlando a súa vantaxe sobre o terceiro.
Clasificación 1.500 ml
1. Jake Heyward (GBR) 3:56.73.
2. Dries de Smet (BEL) 3:56.98
3. Adrián Ben (ESP) 3:57.32
Clasificación 5.000 ml
1. Jakob Ingebrigtsen (NOR) 14.41.67
2. Tariku Novales (ESP) 14:44.66
3. Dorin Andrei Rusu (ROM) 14:46.07
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.