A Xunta dalle 800.000 € ao arzobispado de Santiago
Son para a Fundación Ad Sanctum Iacobum Peregrinatio, un ente controlado pola Igrexa Católica, creado en 2009 pola Arcebispado de Santiago co fin de coordinar os esforzos económicos e a captación de subvencións do Xacobeo 2010.
Por Walter Burns | Santiago | 05/09/2010 | Actualizada ás 11:49
O certo é que esta estratexia funciónalle, pois este xoves o Consello da Xunta aprobaba un convenio de 800.000 euros para que esta fundación adapte como albergue de peregrinos un andar da Igrexa San Antonio de Padua, no popular barrio compostelán de Fontiñas.
A Xunta pagará a reforma a través dun convenio de colaboración. É dicir, non hai concurso público para a adxudicación da reforma do albergue, senón que o Goberno escolle a Fundación para realizar a obra.
Chama a atención que se entreguen tal cantidade de cartos a dedo á Igrexa cando a oposición leva todo o ano denunciado a falta de investimento na adecuación e delimitación de moitos tramos do Camiño de Santiago. De feito, a maioría dos concursos para tal fin aínda seguen sen resolver. A reforma da Igrexa de Fontiñas realizarase, ademais, cando o Ano Santo estea finalizado, polo que a demanda de aloxamento para peregrinos en Compostela descenderá notablemente.
A Fundación Ad Sanctum Iacobum Peregrinatio está baseada no Mosteiro de San Martín Pinario. Saltou aos titulares dos xornais a comezos deste verán, cando presentou Xubi, a mascota “oficial” do Xacobeo, que acaba de abrir unha tenda propia na zona vella de Compostela, na Rúa Tras Salomé.
