Por E.P. | SANTIAGO DE COMPOSTELA | 03/08/2017 | Actualizada ás 14:39
A Xunta acaba de crear unha axendia da industria forestal. Unha nova axencia pública que chega xusto cando no país hai aberto un gran debate sobre o futuro do eucalipto e cuxo obxectivo é "revalorizar" o sector da madeirade axudalo a "avanzar, innovar e crear máis emprego de calidade".
Con esta axencia, o Executivo autonómico pretende "distribuír" as competencias na xestión do monte, que quedará dividida en dúas vertentes: por unha banda o ámbito económico --que dependerá da Consellería de Economía e Industria-- e, por outro, a política contra incendios e de ordenación, da que se seguirá encarganda Medio Rural.
Así o avanzou o presidente autonómico, Alberto Núñez Feijóo, ao termo da reunión do Consello da Xunta, na que se acordou a creación desta axencia, que está previsto que entre en funcionamento a partir do próximo mes de setembro.
Trátase, segundo aclarou Feijóo, de "cumprir a palabra" dada ao sector madeireiro e, deste xeito, que exista un órgano "específico" que se faga cargo da vertente económica da explotación dos recursos forestais a través dunha axencia que dependerá da carteira de Economía do Goberno autonómico.
Un "sector importante"
“Aprobamos hoxe de xeito definitivo unha ferramenta clave para revalorizar o sector da madeira”, aseverou, subliñando que o sector forestal galego está formado por preto de 3.000 empresas, que empregan a máis de 80.000 persoas e facturan arredor de 2.000 millóns de euros.
Durante a súa intervención, Feijóo subliñou que o obxectivo é que o sector conte cun órgano específico que traballe en medidas concretas para a industria forestal: para incrementar o valor dos produtos, para incorporar cada vez máis emprego cualificado e para innovar con máis intensidade.
Con esta finalidade a axencia centrarase nas pemes que conforman a cadea forestal, e que pertencen a subsectores como a explotación forestal, na que se inclúen traballos de corta e saca, de silvicultura e comercialización de madeira en bruto; na primeira transformación, á que se dedican sobre todo os serradoiros; e na segunda transformación, da que forman parte os traballos de carpintería e mobles, madeira tratada e elaborada, fabricación de portas e ventás e o sector contract, entre outros.
“Cremos que debemos exportar máis”, afirmou incidindo en que a axencia se poñerá a traballar de xeito inmediato para contribuír ao progreso da industria forestal, que xa acumula crecementos importantes nos últimos anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.