Por Galicia Confidencial | Narón | 05/08/2017 | Actualizada ás 11:35
Outro episodio dun xabaril paseando por pleno centro urbano sorprendeu recentemente aos cidadáns de Narón. Nesta ocasión foi en Ultramar, pero xa tiñan aparecido pola Gándara, por Piñeiros, cruzando a autovía, ou facendo camiñada pola carreteira de Castela. Os de Narón non son casos illados. Son xa recorrentes as aparicións de xabarís que se achegan aos centros urbanos de localidades de todo o país. O que antes eran anécdotas ou acontecementos curiosos agora son un síntoma dalgo "realmente grave", alerta Esquerda Unida (EU) en Narón. "Que o xabaril teña que buscar comida na zona urbana non é unha anécdota, é un síntoma da enfermidade do agro galego", engade.
O concelleiro André Abeledo sinala que "o xabaril é un animal salvaxe que tenta sempre fuxir do ser humano, e só en moi raras ocasións achegase a centros urbanos; normalmente o fai por fame, no caso que na súa contorna natural non sexa capaz de alimentarse". Outra razón podería ser que "unha parte deste xabaril salvaxe xa non fose tal, e que agora algúns fosen porcos domestico no monte", engade. Pero do que "non queda dúbida" e de que "algo esta acontecendo, e de que a Xunta de Galicia ten a obriga de facer un estudo serio", expón Abeledo.
"O feito de que o xabaril se vexa obrigado a pasearse buscando comida polo centro urbano, cruzando autovías e carreteiras, é un perigo para a seguridade viaria", continúa o representante de EU. Pero as ameazas esténdense aos cultivos agrícolas, que están a sufrir "abundantes danos" nosos concellos nos que se detectou a presenza de xabarís en zonas ocupadas polos humanos. Isto está supoñendo "perdas económicas para moitas persoas, tanto profesionais coma en producións para autoconsumo", describe o concelleiro.
O colectivo de labregos de Narón mantivo unha reunión o día 9 de xuño có responsable da fauna cinexética dependente da Consellería de Medioambiente, que "durante a reunión chegou a preguntar aos labregos cal era a poboación de xabaril na zona, como se fosen os labregos os responsables de contalos", relata Abeledo, quen alerta: "Isto significa que a Administración non conta con datos reais nin estudos sobre este incremento de poboación".
Por todo isto, o concelleiro defendeu unha moción no Pleno solicitando á Xunta de Galicia a elaboración dun plan “real” para dar resposta aos problemas derivados do aumento da poboación do xabaril na comarca; proposta que foi foi aprobada con 16 votos a favor (EU, TEGA, PSOE, BNG, ENE) e 5 abstencións do (PP).
"No caso do colectivo de labregos en Narón, entenden a necesidade de que o xabaril e as outras especies da fauna autóctona estean protexidas, pero tamén que se protexa o seu medio de vida", explica Abeledo, quen entende que "a diminución da superficie agraria, o abandono do rural, o incremento da superficie de plantación de eucaliptos e a falla dunha política real orientada a loitar polo rural están a provocar que o xabaril se converta nun grave problema para as veciñas e veciños".
O concelleiro reclama ao Goberno galego que impulse medidas "reais" para dar solución a curto prazo a este problema, compensando aos labregos polos danos ocasionados polo xabaril, e a medio e longo prazo, controlando a poboación desta especie e traballando por recuperar o equilibrio no monte galego.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.