Recital e soño cumprido
O piloto lucense Jorge Prado, de 16 anos, vence no Gran Premio de Bélxica de motocrós en Lommel, a súa casa dende hai cinco ano. É o seu segundo triunfo no Mundial tralo conseguido en Trentino en abril.
Por gcdeportes | Lugo | 07/08/2017 | Actualizada ás 09:57
“¡Victoria en Lommel! otro sueño hecho realidad”, escribiu no seu twitter. En terras belgas, na súa segunda casa, onde se asentou coa súa familia hai xa cinco anos para progresar e ser o mellor, no circuíto máis difícil do Mundial, o lucense Jorge Prado, de 16 anos, acadou a súa segunda vitoria no Gran Premio de Bélxica de MXGP, na 11ª proba do Campionato do Mundo.
O piloto galego de motocrós fixo unha impresionante exhibición de pilotaxe na segunda manga e acadou a segunda vitoria, despois da conseguida en abril no Gran Premio de Trentino (Italia), e cumpriu co soño de vencer en Lommel.
Prado foi segundo na primeira manga por detrás do seu compañeiro de equipo e líder da categoría Pauls Jonass, pero na segunda, sobre a complicada area de Lommel onde é un consumado especialista, o piloto galego ofreceu unha exhibición de talento, marcou a volta rápida e impúxose con claridade os seus rivais para acadar o seu segundo triunfo.
A Jorge Prado sentáronlle ben as vacacións en Lugo a mediados de xullo para recargar pilas. “Sempre soñei con gañar en Lommel, na pista máis difícil do Mundial. Traballamos duro para recuperar a forma e despois das vacacións en Lugo, adestramos moito e os resultados chegan”, afirmou un emocionado Jorge Prado que, a falla de cinco probas, sobe ata a sétima praza da clasificación xeral do Mundial. A vindeira cita, a próxima fin de semana en Suíza.
