O plan de axudas para emigrados que queiran volver a Galicia a crear unha empresa recibe 21 solicitudes

O plan de axudas da Xunta destinado a emigrados que desexen retornar a Galicia para iniciar un proxecto empresarial recibiu 21 solicitudes a mes e medio de que se peche o prazo de presentación, que finaliza o 29 de setembro.

Diso deu conta este domingo o Executivo autonómico a través dun comunicado, no que lembra que este programa, que contempla axudas de ata 8.000 euros, "xa deu impulso ata agora a 51 iniciativas".

Estas subvencións teñen como obxectivo promover a volta de "galegos do exterior" a través de axudas para que afronten "os gastos que implica o seu establecemento como traballadores autónomos ou por conta propia, ou ben como membros traballadores en sociedades laborais ou cooperativas de traballo asociado".

O secretario xeral da Emigración, Antonio Rodríguez Miranda, resaltou que estas axudas "supoñen unha tripla vantaxe para a sociedade galega no seu conxunto": favorecer o retorno de galegos "na diáspora", traer "emprendedores con coñecementos" e xerar "novos postos de traballo".

Ata agora, 51 iniciativas beneficiáronse destas subvencións, que son compatibles que outras axudas dos diferentes departamentos dependentes da Administración autonómica.