Dépor, o campión como entrante

O actual campión de Liga e de Europa, e xa con dúas Supercopas no peto esta campaña, como entrante na Liga 2017-18. O RC Deportivo arrinca a competición oficial no estadio Abanca-Riazor fronte ao todopoderoso Real Madrid (22.15 horas), un encontro de máxima esixencia para tentar puntuar na primeira cita. “Sabes o que significaría gañarlle un só punto ao Real Madrid de autoestima para todo o club, de autoestima para todos nós. E unha mensaxe de que este Dépor vai en serio na Liga”, sostén Pepe Mel, que pide aos seus xogadores “un Dépor serio, que compita, que xenere ocasións”.

As baixas de Fede Valverde (a chamada cláusula do medo), Emre Çolak (sancionado) e Carles Gil (mancado) reducen as alternativas branquiazuis e condicionan a aliñación do técnico madrileño, que en troques poderá contar co seu único dianteiro, o romanés Florin Andone, malia as molestias que padeceu esta semana. En principio, haberá tres novidades no once inicial con respecto ao curso pasado: o central suízo Fabian Schär e os extremos Fede Cartabia e Bakkali, e o técnico deportivista apostará por tres medios centros con Guilherme, Pedro Mosquera e Celso Borges. O coruñés Rubén Martínez estará na portaría e Juanfran, Sidnei e Luisinho acompañarán a Schär na defensa. No banco, Tyton, Navarro, Arribas, Borja Valle, Bruno Gama, Edu Expósito e Adrián López, o último en chegar, completan a lista de 18. No outro bando, o equipo de Zinedine Zidane chega sen Cristiano Ronaldo, segundo dos cinco partidos de sanción, e Kovacic, pero co arsenal a desbordar: Kroos, Modric, Isco, Bale, Asensio...

O adestrador branquiazul, que lembra que o rival chega con tres partidos oficiais e competindo ao máximo nivel, sabe das dificultades do partido, pero agarda que os seus xogadores aporten “traballo e ilusión” para competir, e que a afección marche satisfeita para casa. "Quero que cando remate o partido, a xente síntase orgullosa do equipo, aínda que perda. Estou seguro que se a xente vaise orgullosa do equipo, non imos perder". Entende Pepe Mel que, máis aló do resultado, importa que o equipo deixe unha boa imaxe neste arrinque da Liga, na que o Dépor aspira a non pasar os apuros de anos anteriores para salvarse. A vindeira cita do Dépor, será o sábado, coa visita ao Levante.