SANTIAGO DE COMPOSTELA | 21/08/2017 | Actualizada ás 14:48 por EUROPA PRESS
O portavoz de Sanidade do PSdeG no Parlamento, Julio Torrado, avanzou este luns mobilizacións en contra do intento da Xunta de reformar a Lei galega de saúde, un proxecto que considerou "perigoso" para o sistema público.
En rolda de prensa, o deputado socialista censurou que, seguindo unha estratexia "vergoñosa e covarde", o Goberno galego iniciase os trámites para modificar a lei "máis importante" do sistema sanitario no mes de agosto.
Así as cousas, avanzou que, no caso de que o conselleiro do ramo non decida comparecer "por vontade propia", levará ao primeiro pleno de setembro iniciativas para forzalo a "dar a cara" na Cámara.
Vista a alta contestación que está a ter o anteproxecto, con case un milleiro de alegacións presentadas no portal de transparencia da Xunta, o socialista esixirá a retirada deste texto e a formación dun grupo de traballo co que acordar os cambios.
Ademais, dada a influencia que terán os cambios que propugna o Executivo autonómico en áreas como Valdeorras (Ourense), O Salnés (Pontevedra) e A Mariña e Monforte (Lugo), o PSdeG está en contacto co persoal sanitario desas zonas para preparar mobilizacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.