A poboación de golfiños comúns en augas galegas aumentou na última década
Os científicos observaron unha tendencia positiva no número de Delphinus delphis, cun aumento anual por ano da poboación de case o 10 por cento.
- Máis de 1,5 millóns de baleas, golfiños e toniñas habitan o Atlántico europeo
- Científicos galegos achegan casos insólitos de infanticidio e aflición en arroaces
- O 100% dos golfiños que varan en Galicia teñen microplásticos nos seus estómagos
Por Galicia Confidencial | Vigo | 26/08/2017 | Actualizada ás 10:12
O número de golfiños en augas de Galicia mostrou nos últimos dez anos un incremento medio de aproximadamente un 9,6% ao ano. Así o constata un estudo sobre a poboación do Delphinus delphis realizado por investigadores do Centro Oceanográfico de Vigo e o de Málaga, do Campus do Mar da Universidad de Vigo, do Southwest Fisheries Science Center do National Oceanic and Atmospheric Administration (NOAA) en California, do centro tecnolóxico AZTI-Tecnalia do País Vasco, do CSIC en Vigo, do Oceanlab da Universidade de Aberdeen (Escocia) e do Centro de Estudos do Ambiente e do Mar (CESAM) da Universidade de Aveiro, en Portugal.
As estimacións dos científicos cifran en 12.831 exemplares a abundancia media de golfiños en augas galegas para o período de estudo, entre 2007 e 2016, sendo o valor estimado do primeiro ano de 8.183,2 golfiños e a abundancia do décimo ano de 17.961. A tendencia axustada mostrou un incremento de 1.086,4 golfiños ao ano, supoñendo un incremento medio anual dun 9,6%. Ademais, o tamaño medio estimado dos grupos de Delphinus delphis avistados é de 16,6 exemplares.
Malia o incremento da poboación desta especie, o informe, baseado en estimacións sobre os datos de estudos multidisciplinares, tamén advirte dunha importante porcentaxe de golfiños mortos, vítimas de capturas incidentais, que supera o límite máximo permisible baixo os criterios do convenio OSPAR (Convención para a Protección do Medio Ambiente Mariño do Atlántico Nordeste), adoptado como un indicador para a Directiva Marco sobre a Estratexia Mariña da Unión Europea.
Con todo, a tendencia positiva da poboación leva a concluír que o golfiño común se atopa nun "bo estado ambiental" en augas galegas.
Os científicos esclarecen que "o aumento da abundancia observado pode ser un reflexo dunha tendencia a nivel poboacional ou simplemente ser o resultado de cambios na distribución debido a movementos a curto prazo en resposta a cambios na abundancia de presas, condicións ambientais, eventos oceanográficos ou ameazas que operan noutras áreas onde se distribúe a poboación".
O estudo, titulado 'Assessing the Environmental Status of the short-beaked common dolphin (Delphinus delphis) in North-western Spanish waters using abundance trends and safe removal limits', pubícase revista Progress in Oceanography.
