#FilosofiaSi para defender esta materia no Bacharelato

Os promotores da iniciativa lexislativa popular (ILP) para pedir que a materia de Filosofía volva ser obrigatoria en segundo de Bacharelato chegaron este mércores ao Parlamento para depositar as 8.200 firmas que secundan esta reclamación.

"Hoxe é un día de festa para a Filosofía en Galicia", celebrou a exdiputada do BNG Carme Adán, unha das portavoces (xunto co decano de Filosofía da USC, José Miguel Sagüillo, e o catedrático Jorge Álvarez) da delegación que impulsa esta ILP.

Tras lembrar que unicamente se necesitan 2.500 rúbricas para que a petición chegue a O Hórreo (os tres grupos da oposición xa avanzaron o seu apoio), destacou a "acollida espectacular" que tivo. É por iso que non dubidou á hora de resaltar que "a xente quere Filosofía".

Nesa liña, e para poder evidenciar todo ese apoio, Adán informou de que en setembro dará inicio unha campaña nas redes sociais que, baixo a lema 'Chía pola Filosofía', anima a tuitear unha frase dalgún filósofo co cancelo #FilosofíaSi.

O MODELO EDUCATIVO

A continuación, explicou que tras a petición de que Filosofía volva ser unha materia obrigatoria atópase unha reflexión xeral sobre o sistema educativo e sobre a sociedade que se está construíndo. Nese enfoque fixo fincapé Jorge Álvarez, quen explicou aos xornalistas que a súa reclamación non obedece a cuestións "académicas", que serían "lexítimas", senón "da sociedade e da opinión pública".

"O que se dirime non é se se dá unha materia máis ou menos en bacharelato, senón o tipo de educación que se vai a formular. Se é un ensino orientado ao técnico, a competencias de operatividade, cousa que é necesaria tamén, ou se é algo máis", reflexionou.

Nese sentido, o catedrático defendeu que o ensino non só ten que servir para achegar estas competencias, senón que debe contribuir "a amoblar a cabeza da xente".

E a Filosofía, como recalcou, "forma" e "non só informa" os estudantes, mentres lles dá "referencias para enfrontarse a un mundo cada vez máis difícil porque é cambiante".

"MOITOS VALORES"

"Hai moitos valores que nós podemos inculcar", abundou o decano da facultade de Filosofía de Santiago, quen saudou este "relanzamento" da materia que parece que se está dando. Preguntado sobre os motivos que levan a que non se cuestione a entrada de disciplinas relacionadas, por exemplo, co emprendemento, e si a Filosofía, interpretou que "parte do problema" reside en que tendemos a "buscar atallos".

"Neste momento de dificultades económicas, de cambios e de incerteza, está a levar a auga ao seu muíño moita xente que non ten unha visión o suficientemente responsable do que son os saberes importantes para a nosa sociedade", sostivo.

Ao fío diso, descartou a idea de que a Filosofía "non é útil". "Saber e opinar son cousas diferentes. Hai opinións ben fundadas na evidencia e outras menos fundadas e máis interesadas", resolveu.