Por Manuel Vilas | Santiago de Compostela | 01/09/2017 | Actualizada ás 08:00
A Xunta acaba de adxudicar a realización dunha campaña publicitaria titulada “A sanidade como servicio público de referencia” por valor de máis de 212.000 euros. A gañadora do contrato é a axencia de Vigo J.J. Comunicación.
Haberá anuncios sobre o SERGAS até o 15 de decembro deste ano en prensa, radio, televisión e Internet. Un dos obxectivos da campaña é informar á cidadanía dos “diversos servizos de natureza pública que a Comunidade pon ao seu dispor así como a necesidade de preservar entre todos os servizos públicos como a educación e a sanidade”, segundo a información do expediente á que accedeu GC.
A Consellería de Facenda, e non a de Sanidade, foi quen adxudicou este contrato o 28 de agosto. Forma parte dun Acordo Marco polo que Facenda aprobou destinar máis de 1,03 millóns de euros a compra de espazos publicitarios nalgúns medios de comunicación.
Facenda adxudicou esta campaña mediante o procedemento negociado sen publicidade. É dicir, non pediu prezo e especificou condicións mediante un anuncio no DOG. Polo contrario, solicitou orzamentos a determinadas axencias. Na documentación pública deste expediente, non figura máis oferta que a da gañadora.
GC preguntou por escrito a Facenda o nome das outras axencias ás que, no seu caso, o Goberno pedira prezo. A Xunta non respondeu, malia poñerse GC en contacto coa consellería en varias ocasións.
Facenda tampouco quixo explicar porque é esta consellería e non Sanidade quen asume o gasto e porque se escolle este intre, no que se debate sobre a reforma legal do SERGAS, para lanzar unha campaña para destacar o seu carácter público.
É necesario agora informar a cidadanía de que a sanidade é un servizo público de referencia? O certo é que esta campaña chega xusto cando a Consellería de Sanidade impulsa unha reforma legal que, segundo numerosas asociacións e sindicatos, abre a porta a privatizar e recortar aínda máis o SERGAS.
A reforma da Lei Sanitaria reduce as áreas de xestión e, segundo a oposición parlamentaria, dá máis poder aos xerentes hospitalarios. O Goberno do PP comezou a tramitar esta reforma a comezos de agosto. Nas mesmas datas é que cando, precisamente, a Xunta comeza a tramitar estacampaña publicitaria, que aportará diñeiro público aos medios privados cando teñen que informar da polémica reforma do mapa do SERGAS.
Os medios que cobrarán por insertar a propaganda gubernamental están especificados nun plan de medios elaborado pola citada axencia. Esta selección de medios foi aprobada, como é norma na Xunta de Feijóo, pola Secretaría Xeral de Medios, que depende directamente do presidente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.