Na procura de aves polos areais vigueses
Este sábado terá lugar a XIII edición do censo de aves en Vigo. Unha xornada na que se analizara a conveniencia de converter á praia da Calzoa nun areal para os cans.
Por Galicia Confidencial | Vigo | 01/09/2017 | Actualizada ás 18:51
Censar e coñecer as aves que aniñas ou pasan por Vigo. Ese é o obxectivo da XIII edición do censo de aves en paso posnupcial do treito costeiro que vai dende Cabo de Mar (Alcabre) ata a Praia de Baluarte (Coruxo), pasando pola Xunqueira do Lagares. Será este sábado, desde as 09.00 horas ata as 13.00 horas.
Nesta actividade os participantes irán acompañados por un ornitólogo da asociación Fontaíña e aprenderán a identificar e a contar as aves acuáticas que se atopen no seu percorrido. A actividade servirá para coñecer o estado ambiental deste treito de costa en xeral e das poboacións de aves acuáticas do mesmo en particular.
Durante esta xornada, os participantes tamén debatirán sobre a conveniencia ou non de que a praia da Calzoa se convirta nun areal para cans. O lugar de encontro será en Cabo de Mar (no extremo leste do paseo de Samil) ás 9:00 h. O número de prazas é limitado (7 voluntarios/as). As persoas interesadas teñen que apuntarse no correo electrónico diegodalimia@gmail.com indicando o número de teléfono e se se precisan prismáticos. É recomendable levar prismáticos e roupa e calzado cómodos para camiñar.
