Xa van 20.000 sinaturas a prol dos dereitos lingüísticos
A Mesa pola Normalización Lingüística, a maior asociación do país a prol do idioma, apura os días para a recoller firmas para a Iniciativa Lexislativa Popular (ILP) Sentido Común. O colectivo pretende que o Parlamento tramite e vote o texto que promove para garantir os dereitos lingüísticos no ámbito socioeconómico e empresarial.
Por Galicia Confidencial | Santiago de Compostela | 05/09/2017 | Actualizada ás 13:01
Nesta recta final de recollida de firmas, a Mesa anuncia que montará dez postos en varias localidades:
- Vigo: 5 de setembro facultade de ADE e 6 de setembro na rúa Príncipe de 17:30 a 20:00
- Tomiño: 6 de setembro, praza do Seixo de 10:30 a 13:30
- Ourense: 6 de setembro, rúa do Paseo de 18:00 a 20:00
- Ferrol: 7 de setembro, praza de Armas de 11:00 a 14:00
- Lugo: 7 de setembro, praza de Santo Domingo de 12:00 a 14:00
- Santiago: 8 de stembro, praza do Toural de 11:00 a 13:30
- A Coruña: 8 de setembro, Mercado dos Mallos de 11:00 a 13:30
- Fisterra: 8 de setembro, paseo da Ribeira de 18:00 a 21:00
- A Laracha: 9 de setembro, paseo marítimo de Caión de 17:00 a 19:00
O presidente da asociación en defensa do galego, Marcos Maceira asegura que “xa ten duplicado o número mínimo esixido e superado as 20.000 sinaturas”. Superar o límite das 10.000 obriga ao Parlamento a tomar en consideración a ILP, pero é moi improbábel que a maioría do PPdeG permita que saia adiante.
A iniciativa pretende lexislar uns mínimos do uso do galego nas relacións comerciais, xa que a súa inexistencia, “malia ser o galego unha lingua cooficial, provoca continuamente situacións de vulnerabilidade, indefensión, denegación da atención e na prestación dos servizos”.
