Por E.P. | SANTIAGO DE COMPOSTELA | 07/09/2017 | Actualizada ás 17:24
O grupo de goberno de Santiago, Compostela Aberta, levará ao próximo pleno municipal unha moción para reclamar a recuperación de dúas estatuas do Mestre Mateo que acabaron en mans da familia do ditador Francisco Franco.
Pero ademais desta vía política, Compostela Aberta sinalou que tamén estuda as vías xurídicas adecuadas para lograr que as dúas esculturas "volvan formar parte do patrimonio público de todos os composteláns".
Trátase de dúas esculturas que representan a Abraham e Isaac, que foron retiradas da Catedral durante as obras do século XVI, e que pasaron a mans do Conde de Ximonde en torno ao século XVIII. Este nobre vendeullas ao Concello de Santiago en 1948 por 60.000 pesetas, a través dun documento no cal se sinalaba que as pezas non podían saír de Compostela, ou ben o Concello tería que pagarlle unha "multa" de 400.000 pesetas.
A pesar diso, as dúas esculturas do Mestre Mateo pasaron a mans da familia Franco fai máis de medio século, a pesar de que non existe ningún documento de cesión. As pezas forman parte na actualidade da exposición sobre o Mestre Mateo que se pode ver no Pazo de Xelmírez, tras pasar polo Museo do Prado.
Compostela Aberta defende que as dúas esculturas non poden volver á Casa Cornide, onde a familia Franco situounas despois de que pasasen un tempo no Pazo de Meirás.
Precisamente, na súa moción, a organización reclama a devolución ao patrimonio público deste inmoble situado en Sada (A Coruña) e que sexa o consistorio o que xestione o seu réxime de visitas. Segundo explicou en rolda de prensa a portavoz de Compostela Aberta, Marta Lois, esperan que a moción sexa aprobada por unanimidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.