ANOVA e BNG reafirman o seu apoio a referendo de independencia en Cataluña
Ante as noticias de que o Estado comeza a perseguir a posta en marcha dos comicios, as dúas formacións políticas nacionalistas galegas máis numerosas reiteraron este sábado o seu apoio a consulta convocada pola Generalitat.
- O BNG marca como reto do novo curso estar "á altura" ante o "evidente" cambio "na estrutura do Estado"
- Feijóo compara o referendo catalán co 23-F e di que en Galicia “nunca pasará” algo así
Por Galicia Confidencial | Santiago de Compostela | 09/09/2017 | Actualizada ás 15:17
ANOVA denuncia que “aumentan as presións do Estado” e acusa ao executivo de Mariano Rajoy de tratar de impedir que “a cidadanía poida expresarse libremente no referendo convocado para o 1-O”.
ANOVA PARTICIPARÁ NA DIADA DESTE LUNS
A coordinadora da formación, reunida esta mañá en Teo, anuncia que unha representación acudirá a Diada deste 11 de setembro. A delegación encabezada polo voceiro Antón Sánchez e “participará nas celebracións e manifestacións” para apoiar “un exercicio de democracia radical, expresión da vontade constituínte do pobo catalán”.
PONTÓN COMPARA A LOITA CATALÁ COA LOITA POLO SUFRAXIO FEMININO
Dende o Bloque, cuxo Consello Nacional reuniuse tamén esta mañá, expresan “o noso apoio á democracia é ao dereito de decidir do pobo de Catalunya. A súa voceira, Ana Pantón, criticou o rexistro da Guardia Civil nunha imprenta catalá e aos que pretenden “vendernos isto como democracia”.
A líder da fronte tamén atacou as medidas xudiciais decretadas pola Xustiza española para intentar impedir o referendo, como as fianzas reclamadas aos dirixentes cataláns. “Por que non responden con seu patrimonio persoal Soraya e Rajoy polos 40.000M perdidos en axudas á banca?”, preguntouse Pontón. A nacionalista sinalou ás activistas que loitaron polo sufraxio universal e a afroamericana Rosa Parks como exemplos dos que “desafiaron a lei para obter dereitos sociais e políticos”.
