Por gcdeportes | Vigo | 10/09/2017 | Actualizada ás 22:22
Ficha técnica:
RC Celta 1: Sergio Álvarez; Hugo Mallo, Cabral, Fontás (Sergi Gómez, 74’), Jonny; Daniel Wass, Jozabed (Tucu Hernández, 80’), Lobotka; Pione Sisto (Emre Mor, 87’), Iago Aspas e Maxi Gómez.
Alavés 0: Pacheco; Vigaray, Ely, Alexis, Pedraza; Tomás Pina, Dani Torres; Burgui (Ibai Gómez, 71’), Enzo (Munir, 57’), Romero e Bojan (Rubén Sobrino, 78’).
Gol: 1-0: Maxi Gómez (minuto 33).
Árbitro: Melero López (andaluz). Amarelas Jonny, Iago Aspas, Jozabed e Maxi Gómez nos celestes e a Vigaray, Alexis e Ibai Gómez nos vitorianos.
Incidencias: partido da 3ª xornada da Primeira División disputado no estadio Balaídos ante 17.384 espectadores.
Nun partido pouco vistoso e con poucas ocasións, ao Celta chegoulle cun gol de Maxi Gómez, o único xogador celeste que marcou nas tres primeiras xornadas, para acadar a primeira vitoria da Liga. O terceiro gol do dianteiro uruguaio e dúas paradas salvadoras de Sergio Álvarez no primeiro tempo. Sen brillo, pero o Celta sumou os tres primeiros puntos en Balaídos.
Volveron Cabral e Fontás ao once titular, e Lobotka no canto do mancado Radoja. Os de Juan Carlos Unzué tiveron a posesión e a iniciativa no arrinque do choque (Maxi Gómez rematou desviado con apenas 50 segundos), pero sen crear moito perigo. E volveron os preocupantes erros defensivos: Bojan tivo un man a man con Sergio Álvarez saíndo dende campo propio tras un pase longo ás costas da defensa, pero o meta de Catoria detivo o disparo coa perna. Dez minutos despois, os mesmos protagonistas co mesmo resultado: Sergio Álvarez evitou o gol.
As dúas ocasións visitantes espertaron o Celta, que chegou á área rival polas bandas. Primeiro pola esquerda, cun centro de Jonny e pouco despois, outro de Pione Sisto que aproveitou Maxi Gómez na área pequena para facer coa testa o 1-0. Jozabed e Aspas tiveron o segundo tras centros dende a dereita de Hugo Mallo, pero sen puntaría.
O Celta apenas tivo problemas en toda a segunda parte para manter con comodidade a vantaxe mínima. Pouco fixo o Alavés en ataque malia os trocos de Luis Zubeldía, que deu entrada a Munir, Ibai e Rubén Sobrino. O equipo de Unzué controlou o partido e tivo as únicas ocasións de marcar, nun chute forte e lonxano de Daniel Wass que petou no pau (minuto 67) e cun potente disparo de Maxi Gómez á reviravolta que se foi ao lateral da rede (minuto 69). Os celestes seguiron controlando o encontro ata o final, sen asumir riscos, e Unzué agardou ata o minuto 87 ppara regalarlle á afección o debut de Emre Mor. O máis importante, o Celta sumou tres puntos necesarios para afastarse da parte baixa da táboa. O luns 18 ás 21.00 horas, visita a Barcelona para enfrontarse ao Espanyol.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.