“Queremos que o pobo galego tamén poida decidir o seu futuro”
A Plataforma Galiza con Catalunya está perfilando un acto para que os galegos poidan mostrar o seu apoio ao referendo pola independencia de Cataluña para final de mes. Así o explica Susana Méndez, unha das súas integrantes e secretaria de organización da CIG, en conversa con GC sobre o proceso soberanista catalán.
Por Manuel Vilas | Santiago de Compostela | 12/09/2017 | Actualizada ás 14:00
Méndez deixa claro que, a parte de apoialo, consideran a reivindicación do dereito a decidir como algo a emular en Galicia, aínda que non necesariamente seguindo os mesmos pasos. “Cando digo emular non me refiro tanto as formas, senón a que o pobo galego tamén poida expresar a súa vontade e decidir por si mesmo o seu futuro, que non sexa un Estado alleo que o decida”, explica incidindo no dereito de autodeterminación de Galicia: “nós pretendemos para Galiza o mesmo, que aquí o pobo tamén poida expresar a súa vontade sobre o seu futuro, porque agora mesmo non pode”.
Sobre a resposta do Estado, centrada polo de agora en perseguir xudicial e penalmente os pasos xurídicos e previr a loxística cara os comicios do 1 de outubro; Méndez cre que non é sorprendente, porque o “Estado actuou sempre así contra calquera intento de expresión popular” e prognostica que “esa represión irá en aumento”.
O Tribunal Constitucional non sería máis que “outro órgano” desa estratexia de represión, ao seu entender. En opinión da Plataforma, “non pode ser que se negue a posibilidade de que un pobo exprese a súa vontade, sexa cal sexa a súa postura sobre a independencia”.
A Plataforma Galiza con Catalunya leva organizando actos en apoio á soberanía catalá dende 2014. Por exemplo, organizou a montaxe dunha V na Praza da Quintana en 2014 en vésperas da consulta do 9 de novembro. Aínda que nas súas reunións se pode participara título individual, o certo é que os seus promotores son case todos colectivos (partidos, sindicatos, centros sociais, etc.) da contorna sobernaista galega de esquerdas.
Tras unha dialéctica política de moitos anos e estas semanas de moita tensión institucional, logrará Cataluña finalmente a independencia? A representante do sindicato CIG agarda que si, aínda que loxicamente non o pode asegurar. O que lle parece evidente é que “estamos ante un punto de inflexión importante, saia o que saia do referendo, o pobo catalán está demostrando que ten vontade de exercer a súa vontade propia sen que haxa un Estado que llo impida”, conclúe.
