Unha muller sofre feridas de consideración tras ser atropelada por unha carretilla elevadora en Xinzo (Ourense)

Unha muller resultou ferida logo de ser atropelada por unha carretilla elevadora nas intalacións dunha empresa familiar situada no municipio ourensán de Xinzo de Limia.

A vítima sofre feridas de consideración e tivo que ser trasladada por Urxencias Sanitarias a un centro hospitalario, segundo informou o Centro de Atención ás Emerxencias 112 Galicia.

O suceso aconteceu ao redor das 23,00 horas do pasado mércores no lugar de O Mato. A muller, que non era traballadora da empresa na que ocorreu o incidente, foi arremetida por unha carretilla elevadora.

Segundo relatou ao 112 unha persoa que se identificou como o fillo da vítima, o accidente puido deberse a un descoido. Tras recibir o aviso, a central de emerxencias puxo o caso en coñecemento de Urxencias Sanitarias 061, Protección Civil da localidade e Garda Civil.