SANTIAGO DE COMPOSTELA | 18/09/2017 | Actualizada ás 15:40 por EUROPA PRESS
O portavoz parlamentario do PSdeG, Xoaquín Fernández Leiceaga, avanzou que o seu Grupo levará o veto á transferencia da AP-9 á próxima sesión de control do Parlamento, unha cuestión sobre a que os socialistas preguntarán ao presidente da Xunta, Alberto Núñez Feijóo.
"O bloqueo deriva de Mariano Rajoy e do PP, polo que a chave para superalo tena Feijóo; é a súa responsabilidade", sentenciou o dirixente socialista, quen criticou a "ausencia de resposta" do xefe do Executivo á decisión da Mesa do Congreso de ratificar o veto a debater a iniciativa que partiu por unanimidade de O Hórreo.
Lembrou que o propio Feijóo, na súa condición de deputado do PPdeG, apoiou esta proposta que reivindicaba o traspaso da AP-9 e advertiu que el é quen debe indicar á sociedade "por onde ir" para lograr unha transferencia que segue sendo "necesaria".
Pola contra, advertiu que terá que explicar aos galegos "o que ten pactado co Goberno nesas conversacións co seu amigo Íñigo de la Serna".
MEDIOS PÚBLICOS
Por outra banda, o próximo pleno incluirá tamén o debate da reforma de lei de medios públicos que --recalcou Leiceaga-- despois de cinco anos "segue sen ser desenvolvida".
En concreto, referiuse ao nomeamento do director xeral por parte da Cámara autonómica, a constitución dun consello de redacción que garanta a neutralidade, a aprobación do estatuto profesional ou a creación da autoridade audiovisual.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.