Policías de Galicia mobilizados a Cataluña contra o referendo
As detencións de cargos de Generalitat provocaron que o debate político no país suba de ton, cando menos por parte de En Marea e BNG; mentres o PP tenta quitarlle ferro ao sucedido e o PSOE pide proporcionalidade.
- Feijóo advirte de que "todos os altos cargos" están "sometidos ao que digan os xuíces"
- Santiago e A Coruña acollen os primeiros grandes actos de apoio ao referendo catalán en Galicia
- Entrevista coa Plataforma Galiza con Catalunya: “Queremos que o pobo galego tamén poida decidir o seu futuro”
Por Galicia Confidencial | SANTIAGO DE COMPOSTELA | 20/09/2017 | Actualizada ás 14:08
O presidente da Xunta argumentou hoxe que “todos os altos cargos sexan de Cataluña, País Vasco, Andalucía, Galicia ou Madrid estamos sometidos á lei e polo tanto fariamos un mal servizo se utilizamos decisións xudiciais para mobilizar aos cidadáns". Alberto Nuñez Feijóo animou a “respectar o estado dereito” e sobre os responsábeis do Goberno de Cataluña detidos remarcou que cómpre respectar a súa “presunción de inocencia”.
Tamén dende o PP e con responsabilidades executivas falou o Delegado do Goberno en Galicia. Santiago Villanueva Álvarez abriu a porta a que policías e gardas civís destinados do país marchen a Cataluña a colaborar na resposta do Estado á convocatoria do referendo de independencia. Para o político conservador isto é algo normal, pode suceder como as veces sucede que se mandan policías nacionais a fronteira de Ceuta, “en función do que se acorde en cada intre por parte do Ministerio do Interior”. De feito, o Goberno central xa mobilizou arredor de 200 efectivos da Policía e da Guardia Civil con base en Galicia cara a Cataluña.
A resposta dende En Marea é, lóxicamente, diferente. O voceiro Luís Villares argumentou hoxe que "os conflitos políticos nunca se resolveron con detencións, senón con diálogo". Antón Sanchez estivo onte na mobilización da Coruña a prol da consulta. Hoxe o deputado e membro de ANOVA pediu o contrario que Feijóo, máis protestas na rúa. “Facemos un cahmamento para que aquí no noso país en Galiza haxa estas mobilizacións pacificas e cívicas porque isto vai moito máis alá da cuestión catalá; é unha loita pola democracia e contra o retorno ao franquismo, cando reunirse e votar era delito”, razonou.
A medio camiño segue o PSdeG. O seu voceiro parlamentar por unha banda dixo que “temos que apoiar ao goberno en defensa do orde da Constitución Española” e admitiu que o Executivo “ten que impedir que o referendo se produza”; pero por outra parte Leiceaga tamén lle reclamou ao PP “proporcionalidade” na resposta do Estado.
Dura resposta da portavoz nacional do BNG, Ana Pontón, que cualificou de "aberración democrática" o operativo da Garda Civil que se centra no núcleo duro de coordinación do referendo do 1 de outubro e que supuxo varias detencións, polo que advertiu de que o PP "está a pasar todas as liñas vermellas". Desde Xenebra (Suíza), onde o BNG presenta este mércores unha denuncia ante o Alto Comisionado de Dereitos Humanos da ONU pola "impunidade" coa que actúan no Estado español entidades como a Fundación Franco, Ana Pontón dixo que as detencións de altos cargos da Generalitat prodúcense "única e exclusivamente porque queren que a xente vote".
Por último indicar que a Plataforma Galiza con Cataluña convocou unha manifestación para o día 30. Paulo Carril da CIG dixo que hai dous días xa a comunicaron á Delegación do Goberno que “fará o que crea oportuno pero terá que aterse a vontade” dos que acudan. Esa plataforma xunta sobre todo a colectivos da esquerda nacionalista. Nela participan, entre outros, ANOVA, BNG, Causa Galiza, FPG, SLG e Galiza Nova.
