Por Xurxo Salgado | Compostela | 22/09/2017 | Actualizada ás 10:20
Dúas das grandes empresas galegas de transformación de peixe, a Marfrio e a Atunlo, decidiron deixar as súas inversións en Galicia e marchar a Portugal. Investirán seis millóns de euros nunha fábrica en Vila Nova de Cerveira. Un paso que dan a pesar de que a Xunta ten visitado as dúas factorías e ten destacado a súa importancia na economía galega. Os sindicatos lusos critican que as empresas galegas marchan a portugal polos baixos salarios e a "precariedade".
E que fai a Xunta para remedialo?. O seu presidente, Alberto Núñez Feijóo, preguntado por GC, insistiu en que o seu goberno ten aprobado xa numerosas bonificacións fiscais para que as empresas galegas sigan producindo no país e, sobre todo, a posta en servizo de solo industrial con prezos máis competitivos que o portugués.
Con todo, e a pesar dos incentivos, as empresas galegas seguen marchando. O 80% do polígono industrial de Campos, en Vilanova de Cerveira, está xa ocupado por empresas galegas. “En Portugal hai menos horas de folga que en Galicia e os incentivos rexionais son 15 puntos maiores aos de Galicia”, recoñeceu o propio presidente galego sobre as posibles razóns desta deslocalización de empresas galegas.
En todo caso, Feijóo insistiu en que a Xunta “seguirá competindo” para mellorar os incentivos portugueses. “A ver que ocorre”, dixo e lembrou que Galicia medra un 3% anual mentres que Portugal aínda non chega a ese nivel. “Imos competir coas zonas industriais máis competitivas de Portugal para tentar ser mellores que eles”, dixo en resposta a GC.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.