Por E.P. | SANTIAGO DE COMPOSTELA | 23/09/2017 | Actualizada ás 15:22
As "bases democráticas" do BNG, que a formación equipara "en calado político" coas "Bases Constitucionais Galegas de 1977", incorporan unha serie de propostas como establecer a idade de voto nos 16 anos, a posibilidade de realizar referendos vinculantes se o pide o 3 por cento do censo electoral e tamén que se poida "revogar" a cargos electos implicados en situacións de corrupción.
No documento, o BNG preséntase como unha forza que "ten lexitimamente como horizonte estratéxico un Estado galego soberano, a República da Galiza" e apela ao conxunto da sociedade galega "para asumir compartidamente que a nación galega pode e debe exercer os dereitos que colectivamente lle corresponden".
En consecuencia, apunta que pode "iniciar xa o camiño para acceder a un novo marco político-institucional que garanta o dereito a decidir" sobre os asuntos relevantes para Galicia e "sente as bases para o progreso e benestar do pobo galego".
Antes do acto de presentación destas bases, que terá lugar este sábado, o BNG avanzou un contido encamiñado a que Galicia "sexa protagonista e non mera espectadora neste momento político excepcional" no que "quedar parado é retroceder".
Como xa avanzara a portavoz nacional do BNG, Ana Pontón, con estas bases, o Bloque aspira a "superar o actual marco da Constitución e do Estatuto, finiquitar un réxime do 78 esgotado e fracasado, e dotarse das ferramentas necesarias para dar aos galegos unha vida mellor".
"Máis aló da política do medo e da represión é evidente que, si ou si, algo se vai a mover no Estado español", destacou Pontón nun comunicado remitido polo BNG, no que subliña que, "ante este momento histórico", o Bloque responde "cunha proposta política de calado" para "superar o actual marco institucional e iniciar un novo proceso constituínte que permita a Galicia camiñar sen lastres".
"A opción non é quedar a ver que pasa porque, se quedamos quietos, retrocederemos como país e o BNG non vai permitir que iso pase", advertiu.
"ALDRAXE BIS"
As "bases democráticas", que serán presentadas nun acto que congregará en Santiago a máis de medio milleiro de responsables políticos e militantes nacionalistas, pretende ser "o arranque dun debate sereno con toda a sociedade galega, co resto das forzas políticas, con colectivos económicos, sindicais, sociais e culturais" para sacar adiante "unha proposta que beneficie a Galicia".
"Galicia non pode baixarse do tren das nacións, non podemos permitir un escenario no que os demais avanzan mentres este país retrocede, porque iso significa perder oportunidades nunha especie de 'aldraxe bis' que só agudizará os nosos problemas", subliña Pontón, quen incide en que esta proposta política é o punto de partida para que Galicia "sexa unha terra das oportunidades na que ninguén quede atrás".
REFERENDOS E OUTROS CONTIDOS
As "bases democráticas" do BNG subliñan que Galicia é "unha nación onde a soberanía reside no pobo galego, que dispón de pleno autogoberno e con todas as ferramentas no político, no económico e no xudicial".
Así, expón fixar a idade de voto nos 16 anos, a posibilidade de realizar referendos vinculantes se o pide o 3 por cento do censo electoral e tamén que se poida revogar a cargos públicos electos implicados en casos de corrupción.
Igualmente, pretende regular por lei a participación e representación paritaria e fixar garantías constitucionais ao exercicio dos dereitos sexuais e reprodutivos, singularmente o da muller a decidir libremente sobre o seu corpo. Así mesmo, expón que quede recoñecido por lei "o dereito das mulleres a unha vida sen violencia de xénero".
RENDA SOCIAL E XESTIÓN DIRECTA DA SEGURIDADE SOCIAL
No ámbito dos dereitos laborais e sociais, o BNG propón a implantación dunha renda social básica que garanta unhas condicións de vida "dignas", unha carta de dereitos sociais avanzada para o conxunto da cidadanía e a "xestión directa" da Seguridade Social, así como "garantía das pensións de xubilación por parte dos poderes públicos".
Tamén inclúe a "blindaxe dos servizos públicos, en particular, saúde, educación e servizos sociais".
En materia económica e de emprego, o BNG reivindica unha facenda galega con "unha política fiscal e financeira propia", decisión "plena" para desenvolver os sectores produtivos e xestionar os recursos do país, unha banca pública galega "con plena capacidade normativa" sobre o sector financeiro que actúe en Galicia, unha tarifa eléctrica galega e capacidade para emitir débeda pública.
GALEGO, LINGUA VEHICULAR
Finalmente, as "bases democráticas" nacionalistas sitúan como "clave" o recoñecemento da lingua e doutros sinais de identidade en Galicia.
"O galego será o idioma vehicular no ensino e Galicia terá plena capacidade para lexislar e desenvolver o sistema educativo en todos os niveis en aras dun ensino público de calidade, laica e en galego", resolve o BNG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.