Feijóo apoia que Interior asuma a coordinación dos Mossos: "É unha defensa dos dereitos civís"

O presidente da Xunta e líder do PP galego, Alberto Núñez Feijóo, apoiou este sábado que o Ministerio de Interior asuma a coordinación dos Mossos ante o referendo do 1 de outubro: "É unha defensa do Estatuto de Cataluña, unha defensa do ordenamento xurídico de Cataluña e do ordenamento xurídico global, unha defensa dos dereitos civís e unha defensa de cumprir a lei".

En declaracións aos medios, o presidente do Goberno galego pronunciouse deste xeito tras ser preguntado pola petición do fiscal superior de Cataluña de que o Ministerio de Interior asuma a coordinación dos Mossos d'Esquadra ante o referendo do próximo 1 de outubro en Cataluña.

"Non hai ningún Parlamento, por moita maioría que teña un grupo ou varios grupos, que poida facer o que queira", subliñou o máximo mandatario galego, xusto antes de pór como exemplo ao Partido Popular de Galicia: "O PPdeG ten maioría absoluta no Parlamento galego, pero iso non significa que podamos aprobar calquera lei".

Iso non significa, continuou Feijóo, que se poida aprobar unha lei "en contra do Estatuto ou en contra da Constitución". "Non hai ninguén que poida facer o que lle da gana, nin o presidente do Goberno nin o da Generalitat, todo o que se está facendo é para protexer os dereitos dos cataláns", afirma.

A continuación, remarcou que a Ertzaintza, os Mossos d'Esquadra e a Policía Autonómica galega están "sempre" a disposición de defender "os principios xerais de calquera Estado democrático". "Non vexo ningunha cuestión atípica nesa defensa e nese compromiso: todas as forzas e corpos de seguridade do Estado, xa sexa a Ertzaintza, os Mossos ou a Policía Autonómica galega, están a disposición do Estado".