Arden dous coches nun garaxe da Ronda de Outeiro da Coruña

Dous coches arderon a pasada tarde do sábado nun garaxe situado na Ronda de Outeiro da cidade da Coruña, segundo informou o Centro Integrado de Atención ás Emerxencias 112 Galicia.

O suceso tivo lugar ao redor das 17,30 horas do sábado no garaxe dun edificio situado no número 30 da Ronda de Outeiro.

Un particular alertou ao 112 a través dunha chamada na que relataba que saía moito fume do garaxe do seu edificio. Ademais, sinalaba que os veciños xa abandonaran o inmoble.

A central de emerxencias pasou o aviso aos bombeiros da Coruña, que se desprazaron ao lugar e extinguiron as lapas, que calcinaron dous turismos.