SANTIAGO DE COMPOSTELA | 25/09/2017 | Actualizada ás 14:54 por EUROPA PRESS
O portavoz parlamentario do PPdeG, Pedro Puy, apelou a tentar pactar a vía para tratar de recuperar para o patrimonio autonómico o Pazo de Meirás, Ben de Interese Cultural (BIC) e propiedade da familia de Francisco Franco, sen custo para o erario público. Por parte do Grupo Popular, subliñou que está "predisposto ao consenso".
Así se pronunciou un día antes de que arrinque o pleno da Cámara, onde se someterán a debate dúas iniciativas de PPdeG e PSdeG, respectivamente, que aspiran a avanzar neste obxectivo.
Precisamente, nunha comparecencia anterior, o portavoz parlamentario do PSdeG, Xoaquín Fernández Leiceaga, explicou que o seu grupo persegue a apertura dunha comisión "plural" desde o punto de vista político, na que, liderada pola Xunta, estean representadas a Deputación da Coruña e os concellos da Coruña e Sada.
Ademais do feito de reunir a técnicos de distintas administracións, outra diferenza que sinalou con respecto á proposta do PPdeG é que non descarta que haxa que "modificar leis" como consecuencia da análise do expediente de cesión do inmoble.
Con estos vimbios, o socialista apelou ao acordo de todos os grupos con representación parlamentaria para traballar por integrar o Pazo de Meirás no patrimonio público. E é que, ao seu entender, a familia Franco só "reflexionará" e "cambiará de actitude" se percibe que "enfronte" ten a toda a sociedade galega.
"NON HAI PROBLEMA"
Pola súa banda, Pedro Puy asumiu as cuestións expostas polo socialista e avogou por que se poida dar "o debate conxunto" de ambas as iniciativas.
"Se esas son as dúas diferenzas, non vai haber problema", augurou, á vez que incidiu na "predisposición" dos populares en traballar con todos os grupos para que haxa consenso na vía elixida.
E é que, segundo as súas palabras, "cando se pide un informe xurídico, entre as vías pode estar a modificación dalgunha lei". "Con iso non hai problema, nin tampouco con que se incorporen expertos doutras administracións", recalcou, sen deixar de subliñar o "ánimo de consenso e acordo" por parte do PPdeG.
Dito isto, mostrouse convencido de que o resultado do debate en relación a este asunto permitirá "ver" se realmente "se fala" da intención de buscar vías para recuperar o Pazo de Meirás "ou doutra cousa".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.