Case 3.200 alumnos galegos de FP e 400 docentes participaron no programa Erasmus+ desde 2012

Case 3.200 alumnos galegos de grao medio e superior de Formación Profesional, así como 400 docentes de Galicia participaron desde 2012 no programa Erasmus+, unha iniciativa que este ano celebra o 30 aniversario da súa posta en marcha.

Santiago de Compostela acolleu este martes o único acto de celebración deste aniversario, un evento no que participaron 300 profesores e alumnos de toda España. Tamén asistiron o secretario de Estado de Educación, Marcíal Marín; o conselleiro de Cultura, Educación e Ordenación Universitaria, Román Rodríguez; e o director do Servizo Español para a Internacionalización da Educación (Sepei), Pablo Martín.

Neste escenario, Román Rodríguez destacou que, nos últimos anos, a Xunta participou activamente en proxectos de calado internacional con Francia ou Italia, mentres que, actualmente, capitanea unha iniciativa sobre o uso das novas tecnoloxías na agricultura e a súa aplicación formativa nos ciclos desta familia profesional.

Así mesmo, o conselleiro agradeceu a posibilidade de celebrar esta xornada en Galicia por dúas razóns. Así, en primeiro lugar, segundo resaltou, "porque nos últimos anos a Xunta realizou unha aposta decisiva pola FP que se traduciu en mellores resultados tanto cuantitativos como cualitativos". E, en segundo lugar, definiu dita celebración como "unha exaltación dos valores que axudaron a construír a UE".

Entre as oportunidades que xera o programa Erasmus+, o responsable do departamento autonómico incidiu na mellora da inserción laboral entre os mozos --que se amplía a través do coñecemento de linguas ou da adquisición de experiencia no estranxeiro--, así como o impulso do sentimento europeo entre a mocidade.

"O Erasmus+ foi, e segue sendo, unha ferramenta fundamental na construción de Europa, dunha Europa multicultural e diversa, pero unida ao redor dun proxecto humanista común", apuntou.

"BUQUE INSIGNIA"

Pola súa banda, o secretario de Estado de Educación, Formación Profesional e Universidades, Marcial Marín, definiu o programa Erasmus+ como modelo para "crear cidadanía europea" e para "reflectir que os diferentes Estados poden conseguir moito máis que cando traballan xuntos". Por iso, describiuno como o "buque insignia e o orgullo da construción europea".

No seu discurso, lembrou que, ao longo destas tres décadas, este programa pasou de enviar 95 alumnos (en 1987) a máis de 64.000 mobilidades neste ano 2017 de todos os sectores educativos. Ademais, destacou que a demanda non para de crecer en FP, de forma que a última convocatoria contou con máis de 8.000 alumnos, cifra que fai que haxa máis de 73.000 estudantes desta modalidade que participaron no programa.

Ademais, o secretario de Estado de Educación lembrou que Erasmus+ destina no ámbito da FP máis de 31 millóns de euros, un orzamento que se incrementou nun 10% nesta convocatoria. Respecto diso, avanzou que esta cantidade se incrementará en "máis de 3 millóns" para 2018, segundo os datos da Comisión Europea.

Marcial Marín tamén destacou que a Comisión Europa traballa nunha nova iniciativa relacionada co programa Erasmu+: o programa 'Role Models'. A través desta, realizaranse actividades de promoción da inclusión social, de prevención da exclusión e da radicalización, así como para fomentar a cidadanía activa e o compromiso cos valores europeos.