Políticos, sindicalistas e personalidades da cultura galega, entre os asinantes do manifesto a favor do referendo

Políticos, sindicalistas e personalidades da cultura galega figuran entre os asinantes do manifesto 'Decidir é un dereito democrático. Apoiamos o referendo en Cataluña', que ten ao histórico dirixente nacionalista Xosé Manuel Beiras, á líder do BNG, Ana Pontón, e ao escritor Manuel Rivas entre os seus primeiros rubricantes.

Xunto a eles, apoian o texto que defende a consulta prevista para o vindeiro domingo os alcaldes de Santiago e Ferrol, Martiño Noriega e Jorge Suárez; así como o portavoz nacional de Anova, Antón Sánchez; ou o secretario xeral da CIG, Paulo Carril. A eles, súmanse outros políticos como a eurodeputada de AGEe, Lídia Senra; a portavoz do Bloque en Bruxelas, Ana Miranda; ou a parlamentaria autonómica de En Marea Paula Quinteiro.

Ademais, tamén secundan o manifesto o exportavoz nacional do BNG e profesor universitario Xavier Vence, a profesora Comba Campoi, ou o escritor Alfonso Álvarez Cáccamo, cuxos nomes aparecen na páxina web do manifesto xunto a outro máis de medio centenar de galegos.

"A situación de Cataluña interésanos e afecta a todos", así arrinca o documento impulsado por máis de 120 personalidades e dirixentes políticos de todo o Estado, no que afirman que o dereito a decidir é "democrático", polo que mostran o seu apoio á consulta prevista para o 1 de outubro.

'Decidir é un dereito democrático. Apoiamos o referendo en Cataluña' está publicado no catro linguas oficiais do Estado e pode lerse na web 'www.manifesto1outubro.org'.