Máis dunha ducia de países na nova feira de negocios sobre o Camiño de Santiago

Fairway, Forum do Camiño de Santiago, aborda o fenómeno do Camiño, cada vez máis popular,  en toda a súa amplitude, tamén dende o punto de vista dos negocios.  Tralo éa primeira cita, celebrada no 2015, os seus organizadores aspiran a revalidar o seu papel como punto de encontro dos profesionais que traballan arredor destas rutas.

Para acadalo adiantan que van contar cun congreso aberto, formado por relatorios e mesas redondas sectoriais; unha feira profesional na que empresas e institucións poderán amosar os seus  recursos e servizos; e máis un workshop que fornecerá reunións de intercambio comercial con destacados turoperadores internacionais.

Confirmaron a súa estadía máis de 30 turoperadores de 14 países distintos: Colombia, Noruega, Irlanda, Brasil, Uruguai, Portugal, Nova Zelandia, Estados Unidos, Canadá, Arxentina, Reino Unido, Italia, Alemaña e España.

Os organizadores queren reforzar desta vez o papel dos vieiros que están en auxe e, para acadalo, prestan no seu concepto unha atención especial aos atractivos e problemáticas dos outros camiños distintos do Francés.

De xeito paralelo a Fairway, Forum do Camiño de Santiago, acontecerán unha serie de actividades de dinamización na capital galega, denominadas Fairway City.

Ademais, xornalistas e operadores turísticos internacionais visitarán tramos do Camiño Inglés e do Camiño Portugués en viaxes de prensa e familiarización.

O primeiro Fairway, Forum do Camiño de Santiago desenvolveuse no 2015 e contou, no seu   congreso, con 50 relatores de alto nivel; 50 expositores na feira; e máis de 100 empresas implicadas. Fairway, Forum do Camiño de Santiago, naceu da iniciativa privada. Está promovido pola maiorista-minorista Viaxes Viloria; a axencia de marketing Mr Turismo; e Trevisani, empresa de organización de eventos, protocolo e relacións públicas, e comunicación.