SANTIAGO DE COMPOSTELA | 06/10/2017 | Actualizada ás 13:20 por EUROPA PRESS
O alcalde de Santiago, Martiño Noriega, asegurou este venres que o portavoz parlamentario de En Marea, Luís Villares, puxo sobre a mesa "asuntos importantes da axenda galega" na súa intervención durante o Debate do Estado da Autonomía.
"Gustoume a intervención de Villares porque, máis aló do debate que se está dando no Estado sobre a cuestión catalá, puxo enriba da mesa asuntos importantes da axenda galega, e iso foi o que non fixo o presidente da Xunta", defendeu o rexedor compostelán, tras ser preguntado polos medios, na rolda de prensa tras a habitual xunta de goberno local.
Neste sentido, censurou que o máximo mandatario do Goberno autonómico tratase de "facer unha redución" de "todo o que sucede en Galicia" a "unha lectura bastante empobrecedora do que está a pasar en Cataluña".
Sobre o conflito catalán, volveu a insistir en que "os conflitos políticos hai que resolvelos politicamente e a través do diálogo". Pero para iso, matizou, ten que haber "vontade" de que haxa "diálogo e intermediación". "Teño as miñas serias dúbidas neste momento de que o Partido Popular estea por impulsar unha vía de diálogo", agregou respecto diso.
Nesta liña, criticou que o PP estea a realizar "un reduccionismo" do conflito catalán ao "marco legal", así como que non recoñeza "a expresión política ampla do pobo catalán": "Parece que non se vai a mover desa posición", lamentou.
"A miña preocupación é moi alta porque se o conflito político non se resolve politicamente quédanos un horizonte preocupante e desolador", resolveu o alcalde de Santiago.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.