SANTIAGO DE COMPOSTELA | 06/10/2017 | Actualizada ás 14:21 por EUROPA PRESS
Os xulgados galegos exclusivos de cláusulas chan recibiron, desde o pasado 1 de xuño, 3.807 demandas relativas a litixios relacionados coas condicións xerais incluídas en contratos de financiamento con garantías reais inmobiliarias, cuxo prestatario é unha persoa física. Un total de 1.295 foron presentadas durante o último mes.
Así o confirmaron fontes do Tribunal Superior de Xustiza de Galicia (TSXG), que sinalaron que, a data do 4 de outubro, o xulgado exclusivo de Vigo (o de primeira instancia número 14) segue á cabeza en número de casos, con 1.740 demandas. Son case 600 máis que as que recibira en algo menos dun mes (os anteriores datos transmitíronse a data de 6 de setembro).
Na Coruña presentáronse durante o último mes outras case 600 demandas (536), de modo que o total recibido por este xulgado ascende a 1.520 demandas.
O xulgado de Ourense recibiu ata o momento 379 demandas, 87 máis que hai un mes; mentres que o de Lugo recibiu 168 asuntos, outras 78 demandas máis.
PROCEDEMENTO
Nas audiencias previas fíxase o obxecto de litixio, as partes propoñen proba e o xuíz admite as que considera procedentes para resolver o preito. Se as partes só propoñen proba documental, o asunto quedar visto para sentenza; en caso contrario, é necesaria a celebración de xuízo.
Os xulgados de cláusulas chan puxéronse en marcha a partir do 1 de xuño en virtude dun plan de urxencia aprobado polo Consello Xeral do Poder Xudicial ante o previsible aumento de litixios sobre cláusulas abusivas nas hipotecas, como consecuencia da sentenza do Tribunal da UE do 21 de decembro de 2016.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.