Creado o comité permanente que adoptará as medidas para responder á alerta por seca

O consello reitor de Augas de Galicia creou e nomeou por unanimidade aos integrantes do comité permanente, co fin de que sexa este grupo o que decida unha resposta "máis rápida e operativa" aos posibles incidentes derivados da situación de alerta por seca en seis sistemas hidrolóxicos da demarcación Galicia-Costa.

Este venres celebrouse en Santiago unha reunión do consello reitor de Augas, co principal asunto na orde do día da asunción da xestión da situación de seca naqueles sistemas nos que foi decretada a alerta.

Segundo figura no protocolo de actuación do plan da seca da demarcación Galicia-Costa, en situación de alerta, a xestión dos recursos hídricos dispoñibles e toma de decisións sobre as medidas excepcionais a aplicar correspóndenlle ao consello reitor, onde están representados todas as administracións, usuarios e resto de axentes involucrados na xestión do recurso.

No entanto, o consello reitor considerou a constitución dun comité permanente, que está formado por representantes da administración, da administración local --nomeado pola Federación Galega de Municipios e Provincias (Fegamp)-- e dos usuarios da auga, que para a xestión da alerta de seca, reunirase cunha periodicidade quincenal.

A próxima semana celebrarase a primeira reunión para avaliar e aprobar as distintas medidas que se considere necesarias. Outras das decisións aprobadas esta xornada, e que se activará a semana próxima, é a apertura dunha liña de comunicación cos concellos afectados para avaliar "de xeito conxunto" a evolución da seca.