A España ultranacionalista provoca á do diálogo e o entendemento
Manifestantes a prol da unidade de España concentrados na madrileña Plaza de Colón baixaron até Cibeles para enfrontarse á xente que, vestida de branco, pedía diálogo e concordia para solucionar o conflito catalán. A Policía Nacional tivo que interpoñerse para evitar a invasión por parte dos nacionalistas españois.
Por Galicia Confidencial | Madrid | 07/10/2017 | Actualizada ás 15:52
850 metros. Esa era a distancia que separaba aos ultranacionalistas españois concentrados este sábado na Plaza de Colón dos cidadáns que piden diálogo e entendemento para resolver o conflito catalán. 850 metros que se reduciron a apenas dous en pouco tempo, cando un numeroso grupo de manifestantes con bandeiras españolas se achegou até Cibeles para provocar aos alí concentrados. Foi a exhibición das dúas Españas, da fractura dunha sociedade partida pola metade, da España dividida, da "unha, grande e libre" fronte á plural, multicultural, plurinacional e diversa. Unha España que provoca e insulta, chea de carraxe e ira, fronte a outra festeira, dialogante, pacífica e sen bandeiras. Dúas Españas separadas por apenas dous metros e unha ringleira de axentes da Policía Nacional.
Mentres milleiros de persoas tinguían de branco a Plaza de Cibeles, fronte o Ayuntamiento de Madrid, baixo o lema "Parlem, Hablemos", outra multitude maior vestía de 'rojigualdo' a Plaza de Colón, convocada pola Fundación Denaes para a defensa da Nación Española. O contraste era máis que notábel: en Cibeles, roupas brancas para simbolizar a paz e o diálogo, carteis a prol do entendemento, ningún altofalante para exaltar ánimos e sentimentos, mans axitadas ao aire como berro, batucadas... e ningunha bandeira; en Colón, milleiros de bandeiras 'rojigualdas' ondeando ao vento, arengas e berros pola unidade de España, desfiles de lexionarios, berros de odio cara a Cataluña e os "rojos", e marcha cara a Cibeles para provocar e desprezar aos pacíficos manifestantes concentrados alí.
Ese foi o momento máis tenso da xornada, provocado por un numeroso grupo de ultranacionalistas españois que se achegou até Cibeles coa única intención de enfrontarse cara a cara coas persoas que reclaman diálogo e entendemento. Non houbo, pola contra, provocacións do movemento "Parlem, Hablemos" aos concentrados en Colón, a onde non se achegou ninguén do movemento pola concordia.
Houbo previamente conatos de enfrontamentos causados por persoas que portaban bandeiras españolas e paseaban por Cibeles provocando aos alí concentrados con berros e consignas contra eles e a súa causa. Pero a efectiva intervención da Policía Nacional conseguiu aplacalos. Porén, cara a unha da tarde —unha hora despois de que comezasen as concentracións nas dúas beiras—, numerosos manifestantes do ultranacionalismo español desfilaron até Cibeles para provocar aos alí presentes. O dispositivo policial non era suficiente para frealos. De feito, só dous furgóns policias e media ducia de axentes separaban aos manifestantes de Colón dos de Cibeles, polo que nun momento houbo apenas un par de metros de separación entre uns e outros.
Fronte aos axitadores, os de branco decidiron entón facer unha sentada pacífica, mentres eran insultados e desafiados polos que portaban as bandeiras españolas. Foi entón cando a Policía Nacional aumentou o dispositivo de seguridade e interpuxo media ducia de furgóns e un numeroso grupo de axentes como barreira, para impedir o paso dos ultranacionalistas, que seguían buscando o enfrontamento cara a cara coa xente convocada en Cibeles. As concentracións deste sábado en Madrid foron unha manifestación máis de que España segue crebada.
